可曾想像過由健美先生所創立嘅跑會係咩一回事? 一直疑惑成身肌肉嘅大隻佬跑步咪即係負重訓練? 有幾快呀? 仲要教人?「Pro Training」正係由前香港青年健美代表隊成員及健美先生 Pierre 所創立嘅健身中心兼跑會。又教健身又教跑步咁駕勢，於是 Peter 派出我同試跑員二號 Gabriel 兵分兩路試探虛實，佢試健身我試跑班，結果，二號當晚一柺一柺的回家，而我幸好還應付得來!
Part 1
Part 2
曾獲頒香港十大傑出健身教練嘅 Pierre Sir，上身嵌著兩塊大雞扒與一整排朱古力，一身肌肉硬朗得似無堅不摧，跑過無數馬拉松、更係 UTMB CCC finisher，且即將挑戰三項戰鐵人賽。外型、速度、耐力全部齊晒 (上天可否公平點?!)，Pierre Sir 姓劉，但絕對唔係流!
誠然每個教練都有其獨到之處，Pierre Sir獨特在以健身教練角度，及對鍛練肌肉嘅專門知識助你強化肌肉及保護筋腱，強調只有處於無痛無傷狀態下才能真正開懷跑步享受跑步。
參加跑會絕不只於求快求速度，為何不可 just for fun?! 當幾乎所有跑友都將「初心」掛於嘴邊之際，有無人話我知跑步嘅初心係咩? 講披醒講配速講心率講課表講嚟緊有咩比賽? 咩都唔講只求每週一晚大伙兒相聚開懷暢跑夠唔夠初心?!
若跑步只一味強調刻苦、磨練與血汗，相信大部份人好快會放棄。所以，哪管健身或跑步，Pierre Sir 只希望能令每位加入「Pro Training」嘅學員真心喜歡運動，能享受當中樂趣已係最大得著。因此你會發現其學員會有一家三口嘅組合、看似小學雞嘅初中生、啤酒肚大叔、美麗40路，甚至年屆花甲嘅老友記，因為嚟得呢度嘅跑友並無打算成為最強，忘我嘅奔跑與盡情嘅汗水才是最大誘因。
Pierre Sir 嘅健碩同性格嘅隨和，反向得嚟卻出奇地惹人好感，長年堅持操練出一副近乎完美嘅 body，卻極鍾情自助餐兼打邊爐且大愛薯片，有無搞錯? 大隻佬唔係只食奶粉同白烚雞肉嘅咩? 自認愛美嘅佢坦承堅持操練嘅動力正係貪靚同貪食，聲稱只要訓練夠多，隊冧晒啲卡路里就可以。如此直率貼地又破格嘅健身跑步教練甚少見，怪不得能招來不同年齡層嘅忠實擁躉。
「Pro Training」嘅學員有才加入一兩個月的亦有跟隨10年的，學員間各有所求但和諧共融，有為健美練大隻、為健康、想跑快啲、陪另一半、減肥、嚟郁吓…..置身當中有種身處天神村嘅無憂無慮。
健美與跑步呢兩瓣稍有抵觸，兼看似刻板與沉悶嘅運動，Pierre Sir 卻有本事將血脈打通，令兩者關係轉化為互補不足。現實中，少林功夫加足球唔肯定有無得搞，但健美加跑步好明顯已被 Perrie Sir 成功烹調成一味男女老幼皆宜嘅「賴尿牛丸」!
The post 尋找跑會的故事 #17 | Pro Training 運動由喜歡自己開始 appeared first on Fitz 運動平台.