近年來，愈來愈多年青人加入網絡界成為Youtuber，拍網片亦已成為不少年青人嘅愛好，因此我哋特意邀請咗人氣網上短片製作團隊 <<小薯茄>>幕前成員之一「朱Mic」，分享當年DSE放榜嘅心路歷程，並就過來人身份將成功入行嘅貼士傳授俾各位應屆DSE考生！
專訪一共分咗三集，今次朱Mic率先為大家公開當年DSE考試成績及加入小薯茄嘅原因，立即去片！拉落啲仲可以睇埋文字足本版。
訪問文字足本版
問 : 當年放榜心情係 ?
答 : 自己Expect考得比較差，Best 5 可能得十三十四分左右，但出到嚟有二十分，分數比預期中好，當其實二十分係一個好中間，有少少尷尬嘅分數，所以當時攞到呢個分都覺得有啲迷惘，就諗我究竟要Retake定係報Jupas，咁最後我就選擇咗報Jupas
問 : 點解當初會揀咗讀工商管理學系(BBA) ?
答 : 因為我中學嗰時有讀BFS，覺得與ECON相關嘅嘢幾得意，本身有啲興趣所有就揀咗呢一科，第二就係睇成績，因為當時我BFS成績都Okay，讀得都算上手同快，所以我就揀咗呢一科。就算大家揀學校或揀科，我覺得最緊要都係睇興趣先，因為如果冇興趣好難讀得好。
問 : 幾時開始鍾意拍片 ?
答 : 中六畢業之後去咗一個Grad Trip，當時嘗試拍低自己去旅行嘅過程，然後發現原來紀錄生活呢件事都幾得意，然後去到大學Year 1就開咗個Youtube Channel，嘗試自己營運，發現我對拍片都幾有興趣，變咗一個新嘅興趣，因為自己本身鍾意打鼓，不嬲都淨係讀下書打下鼓比較普通，有咗呢個興趣之後，做多咗呢樣嘢，探索多咗，見嘅嘢都多咗。
問 : 讀大學時有咩規劃 ?
答 : 嗰陣都有少少Lost，因為自己讀緊嘅嘢同想做緊嘅嘢有少少唔同，例如我讀緊Business，但我想做Media同網絡相關嘅嘢，當時都有少少Lost，諗自己有冇做錯決定，但最後我都係好簡單Set咗個Goal俾自己，如果我畢咗業兩三年嘅時間，我會好努力做關於網絡嘅嘢，會好努力拍Youtube，咁如果冇乜成績先返去做返商科嘅嘢，但好好彩地喺臨畢業前參加咗小薯茄嘅幕前招募，最後成功咗，而小薯茄都俾咗一個平台俾我發展自己嘅興趣。
問 : 點解後來會加入小薯茄 ?
答 : Year 1就開咗個Youtube Channel，嘗試過拍好多唔同類型嘅嘢，例如Vlog、綜藝等，接觸咗好多唔同嘅器材，發現咗自己好有興趣。小薯茄係我一個睇開嘅Channel，我好Buy佢哋嘅Concept，小薯茄影片節奏好快，片長比較短，有時會因為一個劇情反轉，好容易就出到嗰件事。呢個咁快嘅節奏同咁幽默嘅方式，感覺非常網絡，我好鍾意呢個方式，所以想加入小薯茄。另外因為小薯茄規模大，入到嚟都俾咗好多機會我去學習及展演自己，所以當知道小薯茄有幕前招募就好快去參加。