衛詩雅自爆初出道試音錄到嘔　感嘆入行多年零新聞：好想製造啲緋聞

現年39歲的衛詩雅出道16年拍過逾40部電影，今年終於憑《不日成婚2》首度入圍香港電影金像獎最佳女主角，她接受電台節目《星光背後》訪問今日（30日）出街，大談浮沉影圈多年終被看見的感受，透露當年霍汶希本想捧她做歌手，試音過程成為難忘經歷。

衛詩雅2008年拍攝《四葉草之盛裝舞步愛作戰》獲霍汶希賞識，簽約英皇成為演員，不過她透露對方最初希望她做歌手，更獲安排到名監製舒文的錄音室試音，但試音過程太恐怖而失敗告終：「我第一次入錄音室，要戴上耳機去聽自己唱歌，但我聽到自己唱歌就嘔啊！嗰陣係舒老闆幫我試音，我仲舉手同舒老闆講要去廁所嘔！佢仲以為我講笑，但我真係去咗廁所嘔。」之後就獲公司安排往演員方向發展，笑稱之後大家對她唱歌再無任何希望。

衛詩雅一出道就獲公司力捧擔任電影女主角，她自認自己初時唔迫諗，以為每個人入行就會擔正，又揭戲中拍檔、當時未成名的陳家樂曾向她訴苦：「嗰時家樂同我講佢好唔開心，佢覺得每次訪問都無咩人理佢，好少問佢野，但我唔為意，因為我啱啱入行唔識去留意呢啲細節，唔明白佢的心情。但經過咁多年後，我就明真係好難受，因為我都經歷過好多，係好難捱！」

衛詩雅入行多年曾跟多位圈中男神合作，卻從來零緋聞，她笑說：「我最大嘅緋聞就係無緋聞，最大新聞就係無新聞！其實我都唔知點解，我都好想製造啲緋聞出嚟！」她強調理想伴侶選擇，只會選圈外人：「一定要係圈外人，因為我唔想話題一樣，我想喺對方身上認識呢個世界，想知其他行業嘅野。」