【王菀之X伍仲衡 音樂特別企劃】為了紀念超過二十年的友情，王菀之（Ivana）與伍仲衡合作炮製了一個特別的音樂企劃，名為「仍然記得嗰一次」專輯，收錄12首歌，由Ivana演繹。其中6首是伍仲衡的作品，部份更還原Demo版，另外6首是顧嘉煇、黎小田、林子祥、林敏怡、李宗盛和許冠傑等殿堂級前輩的作品。日前二人為《假如讓你吻下去》和《倒數》拍MV，《倒數》是鄭秀文《時間之光》的Demo版，MV拍攝期間他們即興四手聯彈，現場變身鋼琴演奏會，全場大飽耳福。
Ivana 和伍仲衡老友鬼鬼，一見面就搞笑互窒。伍仲衡說：「Ivana把聲好獨特…（Ivana：多謝！你讚緊我架呵？）係呀。佢唱歌好細聲，有時喺錄音室都聽唔到，支咪要校到好大聲。（Ivana：我因應你要我咁唱之嘛，要唔要我依家表演爆咪？）唔使。」專輯更收錄伍仲衡初試啼聲，合唱《仍依記得嗰一次》。他笑說：「平時係我做監製叫佢唱完又唱，今次係我入去錄音，佢叫我錄完又錄，係我人生第一次錄歌，可能亦係最後一次。」Ivana說：「我會盡力，唔會成為你最後一次架啦！」
原來在Ivana出道前，幾乎包辦伍仲衡寫給女歌手的歌曲Demo，她說：「呢張碟除咗紀念我哋因為音樂而成為朋友，亦都同大家分享我哋都好鍾意嘅音樂人前輩作品。錄歌翻唱Demo版時，回憶即刻返晒嚟！」Ivana感謝伍仲衡為了今次企劃，錄音室添置了不少高級器材，還推介專輯導賞，伍仲衡說：「日頭返工幾忙幾煩都好，夜晚一開呢張碟，即刻沉澱，然後一夜好眠，所以要每晚聽。最好攞住杯紅酒，慢慢歎。」在旁的Ivana笑說：「我唔飲酒架，不過都可以拿住個酒杯，chill吓！呢張專輯好適合狂loop，唔好一開就瞓呀，點都要聽完先至去瞓覺。」
#王菀之 #伍仲衡 #假如讓你吻下去 #倒數
#香港製造 #MadeInHongKong #香港人撐香港音樂
#2021新歌 #新歌 #廣東歌 #2021廣東歌
----------------------------------------------
👍🏻 Facebook：https://bit.ly/2HZAgDL
♥️ IG：https://bit.ly/34PhuYx
⭕ YouTube：http://www.youtube.com/c/谷Live
🏆 谷撐音樂流行榜：https://bit.ly/3q6yB0l