新西蘭皇后鎮國際馬拉松，又稱「世界最美跑道」。本地馬拉松賽事已跑膩？不妨考慮到新西蘭跑步，一邊欣賞森林湖泊，一邊將鎮上所有精華景點盡收眼底。皇后鎮馬拉松更結合路跑和越野跑於一身，沿途有如《魔戒》仙景般嘅賽道，一定唔會令你生膩。
皇后鎮係新西蘭最知名嘅度假勝地，四周環山面湖，當中嘅瓦卡蒂普湖（Lake Wakatipu）更係新西蘭第三大湖泊。除咗圍繞美麗湖泊而跑之外，起跑點嘅「箭鎮」（Arrowtown）更係《魔戒》拍攝場地。
住宿方面可以考慮Airbnb，因為當地酒店價錢比較貴，而且選擇不多，相反Airbnb較易搵到地方寬敞、價錢相宜，甚至是對住靚景嘅民宿，適合休養備戰。
今次我哋就揀咗就近瓦卡蒂普湖嘅民宿，每朝一打開落地玻璃門就對住無敵大湖景。由於皇后鎮係無光害小鎮，晚上能夠用肉眼睇到漫天星河，坐喺露台觀星就成為咗每晚指定活動。
The Nest Apartment
地址 : Queenstown, Otago, New Zealand
順帶一提，皇后鎮馬拉松於每年11月舉行，係魯冰花（羽扇豆）盛開嘅季節，馬拉松賽前可以先到訪蒂卡波湖（Lake Tekapo），呢度係最有名嘅賞魯冰花勝地。從皇后鎮岀發自行開車需要約3小時，另外亦可坐城際巴士（Intercity）前往，早上8點半的班次需4小時車程，車費為49紐幣（約264港元）。
睇完魯冰花，就返皇后鎮嘅Expo拎選手包。我哋嗰年去嘅Expo規模唔算大，唯一賣點就係2XU嘅小攤位，售價比香港平三成，值得購入。
Marathon Sports Expo
地址：Queenstown Memorial Centre（皇后鎮紀念中心）
終於到咗比賽日，大會安排接駁巴士由皇后鎮送參賽者到起跑點「箭鎮」。馬拉松賽道70%係堅硬的泥土小徑，30%為公路。頭段跑道簡直喺森林仙境中穿插，而當中跑道多以小石路為主，又有好多泥土山徑，感覺好似玩緊越野賽，好特別。
中段同後段路都沿湖而跑，最有印象就係跑經海耶斯湖（Lake Hayes）及索托瓦河谷（Shotover），有水流同吊橋作背景，襯托咗幅好美麗嘅圖畫。
最尾10km，正值烈日當空，係挑戰跑手嘅體能極限。幸好沿途有唔少啦啦隊為選手打氣，士氣高昂令到參賽者充滿力量，堅持完成賽事。賽事仲設有3km趣味兒童Kids run，真係老少咸宜嘅跑步活動。
今次比賽有段小插曲，就係我喺後段因猛烈暴曬天氣，導致水份流失太多而抽筋，正準備放棄之際，家人突然岀現應援，令我充滿力量仲加速衝刺。喺好多海外賽事都允許親友陪跑手一齊跑完最後幾公里，對跑手嚟講係好大鼓勵。
要提提大家，全馬賽事限時為7小時，各位唔好顧住欣賞靚景而忘記大會有關門時間。終點就係攞選手包嘅地方（皇后鎮紀念中心）。完成選手會得到一面獎牌，記得要成日帶住佢岀街，因為大會同當地商戶合作，選手只要喺星期六、日岀示完成獎牌，就可以得到折扣優惠。
皇后鎮馬拉松（Queenstown Marathon）
比賽日期：2019年11月16日
截止日期：即日至2019年11月13日
全程馬拉松：156.6紐元（約842港元）
報名官網：https://queenstown-marathon.co.nz
皇后鎮基本資料
地理位置：位於新西蘭南島奧塔哥大區的西南部
時區：夏令比香港快5小時，冬令快4小時
簽證：持有香港特區護照可免簽證
官方語言：英語
民族：毛利人（Māori）是新西蘭境內的原住民
主要宗教：基督教
氣候：夏季的平均最高溫度約為20-30ºC，冬季溫度約為10-15ºC
撰文及攝影：蘇兒（Zoe）
鍾情於打排球同跑步嘅女生，閒時環遊世界發掘美景。期望可以跑晒世界上有名嘅馬拉松。
