同胡鴻鈞撞樣點算　咁邊個先至係陳柏宇？

樂壇校長譚詠麟日前將孖女衛詩認錯做衛蘭，笑料百出，問番圈中藝人有冇遇過認錯人又或者被人認錯嘅尷尬場面。歌手陳柏宇就兩樣都有，真係爆笑！至於宋芝齡同吳沚默就選擇畀人認錯嘅話，都唔會點澄清，免除嗰一刻嘅尷尬！

試過認錯人，亦被人認錯過的陳柏宇談及經過：「我以前住西環嘅時候，有次我喺架車入面見到路邊個人，我以為佢係我個朋友嘅男朋友，同佢吹咗水，吹完問佢係咪返屋企，佢話係呀，我話你屋企唔係喺嗰邊，佢話喺另一邊，我先知嗰個人唔係我諗緊嗰個人，但我最終冇find out（找出）佢到底係邊個，唔知識唔識佢添！」

另一次，陳柏宇喺一間貓cafe度，有幾個十幾廿歲嘅𡃁妹仔一齊逗貓，跟住妹妹仔們問柏宇：「你係咪《降魔的》，我話我唔係，我話《降魔的》嗰個係胡鴻鈞，我係陳柏宇，佢哋仲話陳柏宇？邊個係陳柏宇。」

至於宋芝齡就有咁嘅趣事：「好多人叫我咗我做宋熙年，宋熙年都有同我講有人叫錯佢做宋芝齡，（畀人認錯會唔會好尷尬？）都唔會，試過我喺街度，同朋友傾得好開心，有時會大聲笑咗出嚟，引起一啲人注意，有人會講，『咦？宋熙年呀！』我會直接答：『係呀，哈哈！』亦曾經有人話，你咪係主持《都市閒情》嘅宋熙年？我都會直認，唔會特登糾正，有啲同事聽到仲會搭訕，『係呀，結咗婚，生咗一個添！』哈哈！冇乜所謂！」

身為無綫電視經理人合約藝員和編劇吳沚默就同賴慰玲撞樣：「好多人都話我同賴慰玲撞樣，好多人認錯我係賴慰玲，我起初會澄清番，但後期都冇喇，佢有咗嗰陣，仲有人恭喜我，我照幫佢接收晒，然後講番畀佢聽，佢都話我出劇嗰陣都有人誤會咗佢喺我。」

曾參與多部香港獨立電影拍攝的蔣祖曼就被誤認是廖子妤：「我唔止一次畀人認錯做廖子妤，有次喺尖沙咀，我見有班電單車發燒友，有個叔叔揸住架車勁靚，我咪行埋去同佢傾偈，傾完陣電單車經之後，佢話有睇我同張敬軒個MV，我都有啲唔好意思。不過我每次都會冒認，如果佢叫我簽名合照都照簽Fish，好好玩！」

東網網站 : https://on.cc/

東網Facebook專頁 : https://www.facebook.com/onccnews/