【時尚CHOCO】金色睫毛膏真係work？一齊試閃爆聖誕新妝品

要數CHOCO最喜愛的節日，聖誕節一定有份，除了因為有禮物收，亦因爲有大條道理可以扮靚，以誇張妝容示人都冇問題。其中閃亮元素萬年長青，融入在造型內華麗之餘又有仙氣。Clarins今季就以Shimmer & Shine為主題，推出3款應節妝品，幫姊妹們閃爆聖誕。

新品中星鑽瑰金睫毛膏最吸引本小姐目光，品牌稱內含高反光度的微細金色閃片，塗上睫毛上會帶出閃爍效果。不過上手試發現都頗難控制，同時又不易上色，使用時要預備多點時間慢慢塗才能把閃片置於睫毛上。相反因為眉毛相對較密，容易卡住閃片，出來的效果更佳。

承接去年聖誕大受歡迎的閃爍蜂蜜凝亮護唇油，品牌今年在系列裏加入閃爍紅莓及性感黑莓色號。前者加入閃金光感珍珠粒子，幫手增強唇妝立體和豐盈感。後者雖然是紫色卻沒有中毒感，反而散發陣陣神秘感覺。