Supper Moment 正式出道九年，首度推出精選大碟《19 Moment》，斥資七位數字遠赴美國，為十九首精選歌曲重新編曲及錄音，四子笑言今次花了大半身家成其美事，為的是讓Supper Moment 留下一生難忘的回憶。
遠赴美國錄音
Supper Moment 四子連同工作人員，十二人浩浩蕩蕩遠赴美國二十三天，完成十七首歌曲的錄音，坦言壓力特別大，因為這個任務絕對不容有失，低音結他手CK 表示：「喺出發之前我哋計過，其實仲差四日先可以做晒十七首歌，所以時間好趕，去到美國，日日要做十二個鐘先可以趕起晒所有歌！」加上香港錄的兩首歌，全碟共有十九首，電結他手阿雞笑指，美國之旅雖然辛苦，但目標達成，對於四子來說，總算是成就解鎖。
斥資七位數字
為一張精選大碟斥資七位數字，將歌曲重新編曲及錄音，主音Sunny 坦言所花的時間及金錢，足足可製作兩至三張新碟，值得嗎?Sunny 說：「呢張唱片有幾樣嘢想表達，俾近幾年先聽Supper Moment 嘅樂迷當一張新碟嚟聽，因為呢一張絕對唔係常規嘅精選碟，對於我哋四個嚟講，我哋係做緊一個音樂實驗，外地嘅器材影響我哋幾多？呢一次去美國，我哋喺製作上亦參與多咗！」鼓手阿達則笑指，難得遠赴美國錄製唱片，同行亦安排了攝影師為他們拍下點滴，以製作音樂紀錄片。
《19 Moment》的最愛
主音 陳仕燊Sunny——《尋回一碗湯》
「做呢張唱片嗰陣，改編過程入面，成日都要面臨喺突破同保留之間點樣去取捨，每一首歌唔係為咗改編而改編，但呢首歌就係可以搵到一件啱着吓嘅衫，以前版本同而家嘅版本，最大分別係舊版本城市小品啲，講一個人放工返屋，Supper 近年多咗機會出去見多啲唔同嘅事，好記得由美國返香港嗰程機，我不斷Loop 呢首歌，有一種離鄉別井嘅感覺喺入面！」
低音結他手 張祖光（CK）——《Love Song》
「喺我哋第一首歌，當初邀請Sunny 加入Supper，佢不時拎起結他彈呢首歌俾我聽，嗰陣都無諗過呢首歌可以帶入Supper Moment，後來Sunny 加入，反而變成我哋嘅禁歌，因為太青澀啦，Sunny 寫呢首歌嗰陣只有15 歲，我哋都無咩機會唱，今次喺《19 Moment》入面出現，都需要好大勇氣，其實好開心，一首十幾年前嘅歌，再一次出現喺2019 年。」
電結他手 梁燿鵬（阿雞）——《月亮代表我受了傷的心》
「以前錄音好多時都係先錄一個樂器嘅音，之後再錄另一個樂器，不過今次去到美國，混音師話不如試下兩支木結他同琴一齊錄，當初我哋都擔心得唔得㗎？其實好冒險，呢首歌又少玩Live，怕唔夠熟，不過反正都使咁多錢嚟美國，咩都試吓啦，壓力都好大㗎，因為只要彈錯一粒音，對方支咪都會收到晒，又要重新錄過，錄咗十次左右，終於OK 啦，最終好似錄左十二、十三次就收貨！」
鼓手 陳鴻達（阿達）——《點滴》
「其實《點滴》差啲被踢出19 首以外，因為太過青春，我哋玩Live，好想將《點滴》擺入歌單，但係唔知點排位，因為同而家年代嘅我哋唔夾，亦唔知用咩方向去改，好好彩，喺我哋去美國前，終於有骨幹出咗嚟，去到錄音室錄，出嚟效果比預期好好多！」
Supper Moment 直言做這張唱片尤如做一個音樂實驗。
在美國錄音時，每天要在錄音室工作十多小時。
四子在美國完成《19 Moment》。
TEXT：老詠誼