馬國明大爆被女星誘上房　吳啟華：晚晚都派呀！

劇集《飛虎之雷霆極戰》現正熱播，有份參演嘅馬國明、吳啟華、王敏德及陳山聰一同接受伍詠薇（伍姑娘）同林盛斌（Bob）訪問。馬國明同吳啟華更大爆喺內地拍劇時，被女星主動埋身引誘上房一事！

馬國明話曾有唔係好熟嘅女星主動畀個房號佢，但佢就斬釘截鐵話「唔會」：「唔會啦，一定唔會啦，一陣一入去成班麻甩佬捉你黃腳雞，通常都係跣你唔係愛你！主動到咁梗係唔會啦，我覺得你裝我多過真係愛我，有啲想報警添呀！」當阿Bob問到係咪幕前演員，馬國明就話係，不過就唔講邊個喇！

之後吳啟華再加碼爆料：「我聽過啲直情成組人派晒，連camera man（攝影師）都有呀！壞女人可以壞成咁，大家都知嘅！」之後佢哋笑言可能人哋係賣日用品啫！佢就直言對方好「得」，伍姑娘追問：「仲要係女一嚟嘅？」吳啟華冇否認，諗咗諗答：「好…萬人迷呀！」嚇到全場嘩然！最後被問到：「如果佢淨係畀你呢？」吳啟華就笑謂：「咁呢，就可能會考慮喇！」

東網網站 : https://on.cc/

東網Facebook專頁 : https://www.facebook.com/onccnews/