打份電視台工辛苦就梗！更何況係上位小生花旦？捱更抵夜、廠景接外景、冇得沖涼冇得瞓覺、 請假都唔敢怕連累劇組是常識吧？不過凡事都有例外，據悉近年升呢做女一，朱晨麗恃寵生驕有鋪甩底請假癮，惹來《大醬園》台前幕後怨聲載道事實勝於雄辯，同劇的龔嘉欣在私人FACEBOOK出PO呻完再秒刪，一句「怕辛苦就唔好做演員」擺明抗議有人接連請病假唔專業累街坊！
撰文：東方新地 圖片：新傳媒圖片、IG
拍《大醬園》朱晨麗大支嘢 辣㷫龔嘉欣
入行十一年，一向直腸直肚有嗰句講嗰句，龔嘉欣近月大熱天時趕拍三十集長劇《大醬園》，三十幾度要穿三層戲服頂硬上、 又自爆過勞耳水不平衡搞到入院，疑似身心俱疲卻見有人拍劇拍得疏肝隨時請假，終於爆煲，日前在私人FB帳號發表感言，抱怨有人拍劇唔捱得辛苦、暗示別人請假搞到自己捱義氣頂上，矛頭疑似指向早傳不和的女主角朱晨麗。
女一收買人心
雖然是個人帳戶、發文亦已經秒刪，嘉欣表示不願事情發酵拒絕評論，不過據知情人士透露，嘉欣指控絕無冤枉女主角、而同劇亦唔止嘉欣一個有怨言：「朱晨麗同龔嘉欣拍咗兩個月劇，一直冇乜偈傾，煞科慶功宴女主角朱朱做咗女主人，龔嘉欣就唔到個個都知發生咩事。其實唔怪得嘉欣，人拍劇佢拍劇，朱晨麗規矩多過人又成日請假。接劇之前已經好似阿姐咁講明唔接早唔接夜，要有足夠休息。拍拍吓又自己搵PA改期，全組人就佢一個，係得朱朱唔使入組白等；成日臨開工前唔夠一個鐘突然話請假，聽講因為大小姐有習慣一定要瞓晏覺，最離譜係有一次夜晚唔開廠話日頭拍劇中咗暑，但係PA睇過期表，嗰朝根本冇佢份囉！唔止嘉欣，根本台前幕後所有演員都被佢連累，但係啲前輩知佢上緊位無謂出聲、crew同PA就成日畀佢萬歲請飲啤酒同食嘢，側側膊又就晒佢，最後咪得嘉欣一個夠guts表達講不滿囉！」正所謂雞髀打人牙骹軟，之唔係呢種。同人唔同命，其實龔嘉欣入行早過朱晨麗，憑自身努力奮鬥多年，16年終憑《幕後玩家》勇奪「最佳女配角》，論演技同資歷，絕不在朱朱之下，又難怪嘉欣睇唔過眼不吐不快。
真 ‧ 入院
有指朱晨麗藉口中暑甩底入廠拍劇，實情被踢爆與事實不相 符。反而龔嘉欣捱更抵夜日前因為耳水不平衡入院。
捱病嘉欣獲得無綫多個小生花旦包括胡定欣、黃智雯、黃翠如等留言慰問，唯獨合作新劇的朱晨麗不聞不問。
贏民心
是非唔少好在朋友都多，龔嘉欣除咗幫少婦聯盟成員陳凱琳慶祝生日獲得好姊妹安慰完，好彩拍《大醬園》都同同姓三分親的龔慈恩啱嘴形。