【涉撞車案被告脫罪】林夏薇對判決失望：公眾人物應該受傷？

林夏薇早前發生交通意外，她駕車回家時，遭小路出大路的保時捷四驅車攔腰撞倒，林夏薇指意外令她頸椎受傷，而四驅車女司機被控不小心駕駛罪。上星期林夏薇出庭作供時曾表示，當時她以正常車速開車，又謂當時「感覺到」﹑以及瞄到有車頭燈在讓路處，但沒有看到一個實體。案件昨天裁決，據悉裁判官指林夏薇的證供自相矛盾，不能排除被告指林夏薇當時車速太快，故在疑點利益歸於被告下，裁定被告罪名不成立。

裁決令林夏薇大為勞氣，她今早在社交網撰長文，直言對裁決感到非常失望，她直言「馬路殺手」太多，呼籲大家要小心，同時她也不忿表示：「公眾人物就應該受傷？」

林夏薇在insatgram吐苦水：「真係對今次的判決非常非常失望！明明我以正常車速被小路出大路的中港車牌四驅車（保時捷Cayenne）攔腰撞致受傷，估唔到係咁嘅判決！我車被撞的位置是副駕駛座至後沙板，對方是右前輪同前泵把花左（咗）。

對方為自己辯護話佢在讓路停左（咗）2，3秒先駛出，然後佢架車出左（咗）7，8成 我架車先在後飛速平行撞上，以物理學角度睇根本冇可能發生！我點樣可以用我的左車身撞她的車頭！明明車的撞擊傷痕是我被撞，對方竟然惡人先告狀，反過來話我從後衝上嚟！

而事實上嗰個路段已安裝安全島去限制路面闊度，所以條路的闊度根本不可能容得下兩架車平行行駛！但仲失望的是法官竟然考慮對方的車身高過我的車身，同埋考慮我是公眾人物！！

我唔明以上兩點同佢小路出大路撞人，不小心駕駛有咩關係！？！？我在主路正常行駛，被人打橫撞到，我個證供仲點樣可以自相矛盾到！根本就是斷章取義，我是證人在庭上又不能反駁，估唔到人生第一次為警方做證人，公平公正在哪裡（裏）？！照咁講，以後主路正常行駛都要讓小路啦～

真的太失望！人在做天在看，馬路殺手太多了，大家真的真的要小心！#證人唔易做 #躺著也中槍 #正常直行也有錯 #飛來橫禍 #公眾人物就應該受傷？！」

（即時娛樂）