O.U.R.works（平原習作）唱作女生黃妍（Cath）繼出道專輯《黃妍說》後，花了兩年時間籌備全新專輯《九道痕跡》，新碟正式面世！其中收錄於碟內的重點新作〈輕盈〉與MV已新鮮上線。
〈輕盈〉MV於深水埗一帶取景，Cath 解說指：「深水埗畀人嘅感覺係一個舊區，集中居民居住嘅地方，但近年多咗好多文青、手作嘅舖頭，對於好多文青嚟講，佢哋會喺朝早以一個好chill、好relax、好靚嘅狀態去打卡，但其實入夜嘅深水埗你依然會見到好多好沉重嘅嘢。所以喺我同團隊度MV concept時，就打算自己一個人以較自在嘅姿態喺區內遊走。」
話雖如此，但Cath拍MV時卻完全自在不來！「我哋最後上咗天台度拍，天台都幾恐怖，一入夜就有老鼠同曱甴！其中一幕我趴咗喺石壆位，點知有隻曱甴喺我側邊，班crew唔敢出聲，到我拍完離開嗰下見到佢，嚇到即刻彈開！另外仲有老鼠，我見佢哋喺天台度走嚟走去，仲喺啲電線上面行，好似行鋼線咁，真係嚇死！」拍MV搞到差點要吃驚風散，但Cath就是看中了深水埗這種日與夜之間的分別，有鮮明對比。
對於一向熱愛文青風的Cath 近來轉走暗黑系路線，拍MV的感覺又會否很不同？她笑說：「我覺得暗黑系好玩啲喎！其實都唔係話暗黑系嘅，如果久唔久拍MV可以唔使咁開心，同平日攬住結他或開心笑有啲唔同的話，會有種新鮮感嘛！同埋當你好攰時要再笑住嚟拍嘢，個樣就會更加攰。呢一排拍MV啲首歌都係啲唔同情緒嘅歌，有時放空就可以完成到，都幾好玩幾爽㗎！」
〈輕盈〉是講Cath 如何以輕盈姿態去面對沉重的世界，問到她平日如何釋放壓力？「以前會去旅行，尤其是以前返office時，有壓力就放假去旅行咩都唔理、唔做嘢，但係而家因為疫情無得去旅行，我會食雪糕囉！例如有時我做嘢做到好攰，夜晚會突然好想食雪糕，雖然明知食咁多雪糕係咁好，但係我覺得係一個情緒發洩，去釋放壓力嘅一個方法。」
講到面世的專輯，Cath以《九道痕跡》記錄這兩年的變化與成長，她特地邀請更多創作人參與，整張專輯是Cath與團隊的音樂人、監製們、負責影像的Colin、視覺創作的Dorothy，還有從開初一同選歌、一同為每首歌以及專輯定主題的王樂儀的心血結晶。Cath 與團隊在創作過程中不斷溝通，探討的話題亦愈見深入：從Cath自身至世界、從現今至過去、從溫柔至憤怒。
如此赤裸，亦令作品更有重量。碟內除了過去兩年製作的新歌，Cath 更重錄〈刮骨〉，以新唱腔重新演繹這首在她心目中的timeless作品；另有Cath重新填詞及編曲的〈我沒有歌〉，將會在今次的專輯面世。隨碟附送一本《黃妍日記》，Cath希望在音樂以外，以文字分享自己所想：「以我的生活出發，更立體地表達每首歌的情緒。」
隨着推出新專輯，Cath將於本月24日於旺角始創中心地庫CD Warehouse (CD 連鎖店) 舉行《九道痕跡》簽名會，除了與粉絲見見面和短聚外，還想親耳聽粉絲對人自己新碟的反應呢！
黃妍(Cath) 全新專輯《九道痕跡》簽名會- 詳情如下：
日期：2021年7月24日（下星期六）
時間：下午2:00PM
地點：旺角始創中心地庫CD Warehouse 旗艦店
** 凡於各CD Warehouse門市購買黃妍(Cath) 全新專輯《九道痕跡》，便可參加是次簽名會。