今年農曆新年冇得入戲院睇賀歲片，蕭定一投資的《向西聞記新春sp：阿姨！我不想努力了！》可能成為牛年唯一港產賀歲片。
《向》片演員包括何啟華（Dee@Error）、盧覓雪、邱傲然（Tiger@Mirror）、黎萬宏（泥鯭@RubberBand）等。在新推出的trailer中，阿Dee咬住煙仔同條𡃁講：「從來做大事講三樣嘢，銀紙！銀紙！同埋銀紙呀！」這對白正是當年港產片《97古惑仔：戰無不勝》中萬梓良教「陳浩南」鄭伊健做大事的金句，歷代古惑仔果然薪火相傳。
阿Dee除了講「錢錢錢」對白外，他亦即興加插張家輝在《掃毒》中的經典對白「耶穌都留佢唔住呀！」，阿Dee表示，「今次有啲嘢可以試下玩，導演好支持，所以拍攝好開心，試咗好多新嘢，希望大家睇完recall返港產片回憶，如果未聽過嘅就當係廢話笑咗去，最緊要大家開心，笑得出係我最大希望。」戲中講「耶穌」時，阿Dee仲要霸氣地叼住三枝煙，這個動作又係臨場jam，但由於要拍不同角度，所以他不停食煙，「希望觀眾感受到壞過凱婷嗰種感覺！嗰日食幾多枝煙真係數唔到，十零廿枝走唔甩。」
另外，Tiger叫阿Dee幻想銀紙飄落嚟嘅時候，底線好易變面線，阿Dee向雪雪介紹自己是跳舞老師：「叫我華仔得啦，因為好多人都話我似華仔。」今次雪雪有兩個新嘗試，第一是首次在銀幕上講粗口：「其實我2019年下半年到依家，呢年半入面，我嘅日常生活都充滿住粗口，除咗聽人講好多粗口，我自己都講咗好多粗口，冇諗過自己講粗口講到咁流利，所以呢個角色講粗口對我嚟講冇難度。」另一個新嘗試就是食煙，雖然雪雪是報業出身，但她從不抽煙，「戲入面有個情節係阿Dee俾口煙我食，當時我係欣然接受。其實我唔識食，係有樣學樣，竟然過到關，因為我冇濁親冇咳到死，唯一係一cut之後即刻要漱口，好難受，啲味道難頂到爆炸。」
《向西聞記 新春sp：阿姨！我不想努力了》由 hmvod 原創劇《向西聞記》第一季之幕後原班人馬製作。故事以跳舞群組事件做包裝，講述阿Dee是天水圍落難古惑仔，被人追打到旺角，誤打誤撞闖入舞廳避難，因而結識飾演跳舞老師的Tiger及舞廳經理泥鯭；阿Dee和盧覓雪仲擦出一段似是而非的曖昧感情。（牛年大年初一（2月12日）中午12時於hmvod上架。）
撰文：機