「Fearless」紋身刻骨銘心，卡利奧斯捉緊機會絕地翻身

卡利奧斯（Loris Karius）喺2018年歐聯決賽嘅失誤，已經成為足球界臭名遠播嘅一大笑話。比錫達斯、柏林聯兩次外借都無法令人留下深刻印象，甚至偶然出現嘅失誤，令卡利奧斯一直洗唔走「派膠」呢個標籤。
事過境遷，苦等5年，佢喺2023年英聯盃決賽，幸運地得到自我救贖嘅機會，可惜未能完全地「浴火重生」，球隊以0-2落敗，球會68年嘅錦標荒要延續落去。但兩個失波之外，卡利奧斯全場力挽狂瀾，韋賀斯上半場補時射門、般奴費蘭迪斯下半場補時單刀，都過唔到卡利奧斯一關。頸上白皮黑字嘅「Fearless」紋身，正正係佢呢段時間永不放棄嘅寫照。

聯賽盃決賽前嘅英超比賽，紐卡素正選門將樸比領紅出場，停賽令要喺下一場本土賽事「找數」，偏偏撞正呢一場對曼聯嘅盃賽決賽。陣中二號門將杜巴夫卡上半季係曼聯借將，係最熟悉曼聯前線優缺嘅門將，偏偏佢已經幫曼聯喺英聯盃前兩輪把關，令佢冇得踢呢場決賽。賀維手上只得卡利奧斯同基利斯比，最後選擇咗靜待翻生嘅前者。

2018年歐聯決賽當晚，卡利奧斯一手拋波比賓斯馬開齋，之後撲救加利夫巴爾勁射甩手，直接導致利物浦決賽輸1-3。高普事後話，佢比皇馬後衛拉莫斯撞到腦震盪導致表現失準，當然呢個解釋比球迷笑到而家。

卡利奧斯的確確診腦震盪，但歐聯決賽失利亦係不爭嘅事實，促使利物浦高價購入艾利臣，而卡利奧斯就被租借到比錫達斯。2季土超上陣55場睇落唔錯，但中間發生同主帥鬧不和、球隊欠薪等事件，2020年再轉借到德甲柏林聯，但喺爭唔贏正選龍而鬱鬱不得志。2021年夏天再返到利物浦，高普講到明佢冇得踢，留隊靜待完成最後一年合約。

夏季轉會窗過後，卡斯奧斯先同紐卡素以自由身簽約，簽約半年後再續半年，但佢本身嘅定位都係填補卡爾達路（Karl Darlow）受傷下，空出嚟嘅二號門將位置。之後達路外借到英冠侯城，杜巴夫卡（Martin Dubravka）由曼聯歸隊，卡利奧斯一直都係門將位置上嘅第三選擇。

重返英格蘭賽場嘅第一戰，卡利奧斯就要喺全英最大型嘅球場，面對英格蘭足球史上其中一隊成就最強嘅球隊，踢一個主要賽事嘅決賽。呢種壓力，對一個曾經喺歐聯決賽舞台連續犯錯嘅球員嚟講，旁人當然無法感受。

縱然卡利奧斯全身紋身，鎖骨以上始終保持青靚白淨，偏偏頸部左側紋咗「Fearless」字樣。呢五年以嚟奮力重生嘅經歷，喺今場決賽表現出嚟，8次撲救左飛右撲，絕對對得住佢個「Fearless」紋身。

捉緊不可多得嘅上陣機會，今場對曼聯嘅表現，足證佢已經重新起步。係時候放低悲慘嘅過去，迎接下一個長期正選嘅機會。