【仍然記得嗰一次】王菀之與伍仲衡為紀念相識超過二十周年，攜手合作專輯《仍然記得嗰一次》，Ivana感激伍仲衡為音樂路上「伯樂」帶她入行。雖然專輯於大半年前開始構思，但音樂製作只花了兩個月時間光速完成，伍仲衡笑言破晒人生紀錄，笑言以專輯紀念友誼是一件「好威水」的事情！
這次與伍仲衡合作專輯，Ivana表示非常開心和期待，她說：「呢張專輯係一個Special Project，我好期待，因為對我嚟講唔只係一個出碟嘅意義，仲記錄咗我和伍仲衡，兩個音樂創作人識咗二十幾年嘅友誼，係一個Celebration Project。」云云音樂界好友，為何只有與伍仲衡慶祝相識而出專輯呢？她說：「因為伍仲衡帶我入行，佢係我音樂路上嘅『伯樂』，我想以一個特別嘅音樂形式，慶祝和紀念呢份友誼，感謝佢。」
至於伍仲衡，一邊忙著自己的音樂會，又要為這次專輯做監製，他坦言每天與時間競賽，兩個月光速完成，破晒個人紀錄。他說：「今次最大挑戰係時間，兩個月做起12首歌，過往至少花大半年以上。呢兩個月幾乎日日錄音，除咗錄Ivana唱歌，我仲要負責好多樂器和混音。」回想與Ivana第一次碰面要數到二十多年前。他說：「大約21年前，由朋友介紹Ivana幫我唱demo，我第一次聽到佢把聲，嘩好好聽。原來佢自己都識寫歌，於是佢幫我唱demo，我幫佢做demo，好快佢嘅歌由張學友唱咗（《我真的受傷了》），成為大家都好鍾意嘅歌，後來Ivana讀完書返嚟香港做歌手。」
專輯收錄了一半是伍仲衡的作品，另一半是他和Ivana都很喜愛的前輩作品。他說：「我覺得以專輯去紀念一段友誼係『好威水』嘅事，呢份禮物用錢都買唔到，而且係長青，再過多20年甚至30年聽都依然咁正。過往為其他歌手做碟錄完歌我就唔使理其他嘢，但呢張碟連影封面都有我份，所以特別有意義，係完全屬於我嘅Baby！」
#王菀之 #伍仲衡 #仍然記得嗰一次
#香港製造 #MadeInHongKong #香港人撐香港音樂
----------------------------------------------
👍🏻 Facebook：https://bit.ly/2HZAgDL
♥️ IG：https://bit.ly/34PhuYx
⭕ YouTube：http://www.youtube.com/c/谷Live
🏆 谷撐音樂流行榜：https://bit.ly/3q6yB0l