ViuTV原創劇集《無人之境》現正播放，兩位主角周家怡與周國賢（Endy）密密為劇集宣傳，其中周家怡在YouTube講車節目《恨駕女團》找來劇中的老公Endy任嘉賓，二人大談車經，更分享恐怖偷窺經歷，周家怡試過在廁所被偷拍，周國賢則被油頭大叔摸大髀。
周家怡與周國賢同樣是愛車之人，遊完車河後到餐廳醫肚兼吹水，談到拍劇時人前人後兩個樣，周家怡自言有時可以很可愛，有時又可以好凶狠，Endy即說她拍短髮的戲時的氣場令他害怕，周家怡亦隨即分享她凶狠的一面。「有一次去某餐廳食嘢，去洗手間時下面有個手機鏡頭伸入嚟，我以為我啲friend玩，好大聲話：『喂！做咩啊！唔好玩啦。』個相機好快縮走咗，我就知道應該唔係我啲friend，如果係friend嘅，應該就會笑。去完廁所之後我一行出去，我嗰個氣場真係勁！」
周家怡續說：「我出到去向住全餐廳問頭先邊個怕我！大家呆咗，我見到有閉路電視，我話play個閉路電視睇！我嗰個樣突然變咗一個豪氣大家姐。原來係個老闆！我一出到嚟見到有個人衝咗出門口，我就即刻問個職員：『頭先衝出去嗰個係邊個？』佢話係老闆嘅太子仔，轉頭太子仔再返入嚟扮晒嘢問：『咩事呀？』我話：『唔使咩事啦，拎嚟個電話出嚟俾我睇！你應該洗咗㗎啦！頭先你衝出去！』佢話冇『做咩啊？』我話唔好再問做乜嘢，你play個閉路電視，我話：『你都唔係第一次㗎啦！』好有型咁樣，好變態啊呢件事。」
周家怡提及偷拍事件後，Endy聽到嘩嘩聲，他又謂自己很「吸」這些事情。「細個十歲、十一歲，買咗個餐自己坐喺度食等朋友，之後有一個頭髮好似Barcode咁樣樣嘅人無啦啦行埋嚟，佢話：『喺度做乜嘢呀？喺度等人呀？』然後佢隻手就擺落我大髀，我當時着短褲，我覺得好核突嗰刻！梗係即刻走啦！我當時好驚，佢個頭又油又有陣味！呢啲嘢真係防不勝防，有時去酒店都有啲驚呀。」