電競項目加入奧運呢件事都爭論咗好多年㗎啦，去到今日終於都傳嚟好消息啦！近日國際奧委會正式通過成立奧林匹克電子競技運動會，仲提議出年喺沙地舉行首屆電競奧運會！
國際奧委會執委會喺七月頭提出成立奧林匹克電子競技運動會，仲宣佈同沙特阿拉伯簽咗長達十二年嘅舉辦協議。就喺幾日前舉辦嘅國際奧委會年會入面，全體一致通過執委會提出嘅動議，預計2025年會喺沙地阿拉伯舉行首屆電競奧運會。另外，根據外媒報導，國際奧委會好注重電競項目嘅遊戲有冇符合「奧林匹克價值」，所以第一人稱射擊遊戲基本上都唔喺電競項目嘅考慮入面。唯一例外嘅可能就係《Fortinite》，因為始終都要考慮到電競奧運嘅收視率，亦唔想得失第一人稱射擊遊戲嘅玩家同粉絲。
廣告（請繼續閱讀本文）
而至於《英雄聯盟》、《Rocket League》、《Street Fighter》等熱門電競項目亦喺被考慮嘅名單入面。另外亦有傳目前國際奧委會考慮緊加入運動模擬遊戲項目，例如《FIFA》、《NBA 2K》等等。現階段好多有關電競奧運嘅細節都仲未清楚，所有消息都要再等國際奧委會公佈。大家以後打機又多個理由啦，媽媽，你唔好阻止我打機，我要成為電競奧運冠軍！
▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/