可以金毛，可以清純，青春就是可以
青春是…..
青春不由年齡定義，青春是股躁動，實踐理想和追夢 (追劇唔計)，要橫衝巨人，直撞圍牆，要登峰、想摘星。
青春可以著花裙仔和板褲，掛條晃動的馬尾，或染半個頭灰髮，雖然明知會俾老媽哦足3日。
青春是傻傻奸奸，有唔知自己想點的執照。懷疑過自己，也被世界跣過。但仍跌跌踫踫，天真地勇往直前。
青春就是任性，公司唔批假去古巴土耳其旅行，放工時係方丈枱面放低封辭職信。
青春也可以好毒，一個人宅係自己世界，懶理紅塵，不跟俗世，我係我。
多得他們，拉低了平均年齡，一陣帶你哋去老麥食雪糕下。
今日我同青春有個約會，拿著兩個大手抽的代溝，與廿歲出頭的 Rex 和 Harmony 好融洽地 (表面上) 傾了一個下午，感激他們沒有叫我做叔叔 (希望我跑班的同學留意番)。越野跑素來少廿歲左右的年青人參與，兩顆超新星在山徑橫空劃過，近年頻密地站到頒獎台上，引來注視的目光。方便大家認識，為他們整理了兩份跑的resume：
Harmony 斯文靚女，謙遜有禮，兼走偶像派與實力派
Harmony 林楚茹
年齡/教育：大學畢業，工作了兩年。
職業：機械工程
跑經驗：
定向一姐 (稱號我強加的，不過收集了身邊好多市民意見)，中三開始玩定向，現為港隊成員 (不是自稱，由香港定向總會承認，港隊只有6男4女成員)。第一場越野跑是疫情期間，賴係男朋友聳勇玩 The 12 peaks (16K針草帽)，全素人即獲全場第二。在某項活動認識了聰sir，即被踢入TPH (The Peak Hunter)，展開了越野生涯，跑出耀目的成績。
Harmony平均每星期跑量約50K，不算多，是含著對快腳出世的上天寵兒。
年紀輕輕的 Harmony 形容自己是定向的老江湖，相信佢揸的士唔洗睇google map
「第一個50K係TNF100 (2023)，聰sir 好輕描淡寫話我應該可以跑到。」
「佢可能係人都係咁講。」我隨口嗡，Rex 卻在旁狂笑點頭。其實個個教練都係有少少提子，大家又唔需要太認真。
「跑完覺得好辛苦，同自己講以後都唔會再跑50K。」但鏡頭一轉：「我而家跑左6場50K，最近的一場是在浙江的TNF100 莫干山 (爬升2659M)。」莫干山她以6小時05分奪全場女子冠軍，能在國內越野賽稱后，跑好香港故事，證明 Harmony 的實力非凡，也反映聰sir不是祈福黨。
莫干山越野跑挑戰賽50K，首名女子衝線，23歲，香港人
國內的越野賽事稱后，卻像鄰家的小女孩
Harmony的成績表
2024
TNF100 莫干山 | 50km | 6:05:26 | Women 1st
Hong Kong 5 Peaks | 21km | 2:28:11 | Women 1st
Sai Kung 50 | 22km | 2:26:46 | Women 1st
Salomon Hong Kong Dynamic – 50km Challenge | 50km | 7:02:05 | Mix team of 4 3rd
2023
TNF100 Hong Kong | 50km | 6:29:36 | Women 1st
Dark45 | 16km | Women Solo | 1:57:56 | Women 1st
3球野 大帽山場 | 13.2km | 1:17:31 | Women 1st
香港山系女孩跑 | 8.8km | Overall 2nd
Coros 100 | 50km | 7:35:54 | Mix team of 4 3rd
Translantau | 50km | 7:33:35 | Cat. 6th
2022
- V162 | 13km | Female Open | 1st
Rex 羅樂賢
Rex 一take搞掂，換了TNF衫真係好上力 (幫佢講番啲好說話先)
年齡/教育：浸大體育系副學士，將會升大三，冇留過班。
跑經驗：
「中一俾阿Sir捉左入長跑隊，其實唔係咁鍾意跑步。後來打排球，到中四又覺得打波好無聊，於是去番跑步。上網搵下跑會，見到 TPH Youth Team 招生，於是加入。」雖然 Rex 表面像不太知自己想點的毒男，但自己會上網搵跑班報名，反映內含熱血。他是第一位在 Youth Team 被提升至 Elite Team，目前ITRA分是709，如果俾羅伯母知道，實會話考試又唔見你咁高分。
Rex 平均每星期的跑量約100K，好勤力，佢話好愛跑步，咁應該冇乜時間發展其他的愛。
對小Rex來說，這是很夢幻很震撼的場面，
Rex的成績表
2024 V162 H25 – 25km – 1st
2023 TNF 100 – 16km – 1st
2023 Hong Kong Trail Championship – 9.7km | 00:45:59 | -1st
2023 Dark 45 – 16km | 1:30:44 | -1st
2023 Lantau 2 Peaks – 15km | 1:18:35 | – 2nd
2023 Mountain Range Trail SeriesShatin – 25km – 1st
2022 Hysan Hike and Run – 22km | 2:15:03 | -1st
今年聰sir轉了贊助，離開了 TNF team，他推介由 Rex 和 Harmony 取代。約了兩位新進的 TNF team 隊員在彩虹地鐵站會合，跟住上半山的牛池灣公園 (豐盛街)。Rex穿了件 TX 來到，一見全身 TNF 的 Harmony，好擔心咁問：「我洗唔洗換番件TNF 衫?」一臉擔心，是中學生恐怕被訓導懲罰的語氣。
「唔緊要掛，佢都唔睇。」Harmony 回。
「係啦，佢都唔睇。」Rex 講多句令自己安心的說話。其實好想知「佢」係邊個? 同埋想講俾 Rex 知唔洗擔心，我啲文章都係冇乜人睇。不過後來 Rex 都係攞番頂 TNF 帽和換番 TNF tee 出嚟影相，費事「佢」又有說話講，都話 Rex 乖。
聰sir有心有力做越野跑的承傳工作，令年青人多一條摘星之路，不用只求金錢和分數
當一腳栽進越野跑的世界
「你哋玩左越野跑之後，有乜嘢體會?」
「我係定向都係跑短距離，要衝刺，但跑山長距離為主，要適應。我玩左定向好多年，有一定經驗，算係老江湖。但去到玩越野跑，發現原來呢個世界真係好大 (冇錯，我由四方山上波頂都覺得世界好大)，有好多好勁嘅人，覺得自己好渺少。比賽唔係淨係講求速度，仲有好多方面嘅知識要學、裝備、補給、策略等，越野跑我絕對係一個新手。」難得 Harmony 能從高度看世界，覺得自己渺少，才會強大。
「上到山有乜嘢感覺?」
「我冇乜感覺，操山時一 team 人就一齊吹水，比賽時只掛住衝，冇乜欣賞風景 (風景留番俾我哋呢啲慢腳欣賞)。但好享受有唔同嘅路況，當平路跑得耐，又會好期待前面上山，充滿變化。」
「Rex你呢?」
「我覺得好放空。」好簡潔、好 cool 嘅回應。其實 Rex 經常笑，臉上還童真滿滿，是那些女人見到一定會叫佢做「細佬」的大男孩。
「Rex你係越野跑有乜嘢目標?」
「目標? 我其實冇乜目標。」毒性又發作。
「其實都有嘅，嚟緊想跑多些50K，目前跑左兩次。都覺得好辛苦，TNF 果次臨尾要上八仙嶺真係超辛苦。如果多些經驗之後，都想出外參加些國際賽事。」Rex go，如張愛玲說，成名要趁早。
向前看，往上爬，青春好單純
「我都有諗過外國賽事，不過暫時較難攞假 。」Harmony 較成熟穩定，不是在方丈枱面放低辭職信去旅行的 just do it 年青人。他們都會在7月往台灣參加士林越野賽 (23K/34K)，其實 Harmony 已代表過香港參加了3次定向世錦賽，另外還有定向的 World Cup 和 World Game (World Game 是那些不會在奧運中出現的運動)，東征西討的經驗豐富。
「有冇計劃玩 UTMB?」
「UTMB 係一個殿堂級比賽，要準備好至會去。」Harmony 有計劃有部署，不似我貪慕虛榮。
雖然路跑不是他們的主菜，Rex 和 Harmony 都是渣馬的萬金跑手，來屆仍會繼續向錢出發，跑得快，好世界。
將運動轉為職業?
「你哋有冇諗過轉為全職運動員?」
「轉為全職運動員要好多方面嘅配合，要有多項 freelance jobs，例如做教練、接廣告，又或者除了運動做得出色之外，也要發展其他技能至可以 support 到生活，暫時未諗到有乜嘢途徑達致，不過唔否定呢個方向。」Harmony 話未諗到，即係有諗過。
「Rex 你有冇諗過?」
「冇諗過，我覺得都幾難，有壓力，係成績方面要有好大提升。」
「你唔覺得自己可以提升?」
「可以嘅，不過唔擔保可以提升至全職運動員嘅水平。」呢次要出葉倩文的「信自己」。
Rex 將升上浸大三年級，少有學生能在越野跑界與眾高手逐鹿中原
評估毒素
「Rex 聽講你唔係咁鍾意讀書，點解副學士之後又會top up上大學year 3?」Rex本想早點出來工作，不過身邊好多跑友都遊說他先完成學業。
「因為都交左學費，冇理由蝕俾佢。」如果 interview 時說這個原因，下場明確。
「覺唔覺要逼自己做一些唔鍾意嘅事情?」
「果時都有諗過讀書浪費時間，讀完又好似冇乜用。不過讀住先，其實都開心嘅，因為讀書有得跑步。」跟住 Rex 自己都笑。
Harmony 一樣都不嚮往讀書，用堅定的眼神說不會讀港生好熱衷的 second degree (聽住先)。
「相信你哋好少 friend 玩越野跑，你哋覺得與同年紀嘅人有冇乜嘢唔同?」
Rex 同 Harmony 都異口同聲說沒有什麼不同，只不過friend去打波，他們去跑山。
「因為玩定向比賽， 我去左好多歐洲國家，西班牙、葡萄牙、瑞士、芬蘭、保加利亞….等等。我鍾意去旅行體驗，見到靚風景會好開心。」Harmony 剛在週未(1/6)參加意大利的 Orienteering World Cup Round 2。她不像其他在油尖旺蒲的年輕人，她的前路是幅世界地圖。
穿起港隊衫，在意大利的街道奔馳，堅定的眼神，青春的印記
「我不嬲都係少 friend，多數一個人出街，我成日痴住阿媽，好似你哋口中講嘅群腳仔。」Rex 竟然毫無懼色直認群腳仔，贏盡熟女心，一定要俾 like。俗世對男人的定義太狹窄。
「我都唔係 social 嘅人，毒毒地。我覺得 social 好攰，同人傾偈好用力。」Harmony 附和。我諗一眾毒男毒女/社交焦慮症者都會有同感，假若不喜歡社交，同人傾偈時是消耗你的電量，所以攰。相反外向的人，同人吹水時是充緊電，愈傾愈 high。同叔叔傾左咁耐，Rex 同 Harmony 會唔會好攰?
清風拂面，落日為伴，飄揚的髮端，青春的印記
越野跑在成長留下的足跡
「你哋加入左 TPH，參加左唔少比賽，接觸左好多玩越野跑嘅人，對呢班人有乜嘢感覺?」
「我覺得呢班人好大愛，係山上面就算互不認識，大家都會好慷慨互相幫忙，試過有人 share 水果俾我，好有愛。 」Harmony 咁靚女身邊當然多有大愛的人。
說到山上有大愛，我此等大叔都試過。話說去年不自量力貪慕虛榮被損友聳踴參加清邁 UTMB Major Series 50K，跑到約40K接近耗盡，是看見前面隧道有點光的境況，老抽此時到訪，於是站到路旁痛楚地拉筋。有位亞洲籍 (可能是韓國或日本) 男跑手經過，他停下來在背包東找西摷，好想幫忙，最後拿了枝噴劑出來向著我的手手腳腳狂噴，我問 what’s this? cramp fix? 他將枝噴劑拿給我看，噢，原來是枝蚊怕水，因為那裡超多蚊，怕我停下來會被蚊叮。大叔的愛，還有師姐的關心，山徑就是愛的世界。
「Rex 你哋覺得越野跑對自己嘅性格成長有乜嘢影響? 」
「我覺得越野跑啲人好有活力，好外向，而且好多嘢講。」
「呢樣係你嘅相反?」
「玩左越野跑之後自己真係外向左，未跑步之前個人係摺啲，唔係咁多嘢講。跑完步感到好開心。」
「仲有係提升左解難同自理能力，要攞幾多水應該著乜嘢衫都要自己去計劃和決定。」跑步果然是有效的解毒劑。
「覺唔覺得遇到困難會變得堅持左?」
「我不嬲都堅持，我好硬頸。咁樣講得唔得?」Rex 你應該接戲答我：越野跑真係令我堅強左，不輕易放棄。證明 Rex 好真。
「我以前有啲似你講阿神嘅態度，較易原諒自己。」(應該原諒自己定對付自己? |《公司冇迫我跑馬拉松》保錡和阿神的真人對話)「玩左越野跑之後，真係堅持多左，就算果日自己狀態唔係幾好，但都會跟 program 去操練，其實越野跑界嘅氛圍都係咁，會要求自己活係同一水平。」Harmony 真係成熟。
跟住我同 Rex 玩了一個 role play 處境:「Rex當你而家嚟公司見工，我係HR見你。」
「OK。」
「羅生，多謝你今日嚟 in 呢份工，你可唔可以介紹下自己俾我哋認識?」
「我係羅樂賢，我玩越野跑!」
彩蛋 – 聰sir係乜嘢型嘅大佬
「係香港山界你哋最欣賞邊位跑手?」
「一定係聰sir。」Rex 第一時間回答，從心出發，唔係擦鞋。
「除左跑得快，我最欣賞聰sir對腳，線條好靚，皮膚夠黑，我都好想有佢對腳。」嘩，重口味呀，原來 Rex 迷戀聰sir對腳。
對腳肌肉線條又真係幾靚，金黃色，搽啲蜜糖應該好好味
「我最有成就感嘅一場比賽就係舊年TNF 100，我同聰sir一齊參加16K組，我最後快過聰sir，仲攞左8000蚊coupon。」其實徒弟快過師傅，往往最開心的都是師傅。
有個人跑得快過聰sir，點解嘅？因為佢真係好X快 (我個年代不是用L)
Harmony 心有所屬：「我好欣賞敏怡，覺得佢 time management 好好，佢玩長距離，經常要出外比賽，要操練，又係一位全職醫生，真厲害。」敏怡除了骨格精奇，還是好開心好正能量的跑手，樂於助人，零死角。
小粉多興奮 (敏怡問我點解成日在文章提起她，see，真係唔關我事囉)
「聰sir是 TPH 的大佬，你哋會點形容呢個大佬嘅風格?」
「無私!」Rex 好少搶答問題。「講真唔係老馮，我知佢好多嘢都係蝕住做，例如星期四的課堂唔收錢，佢都俾好多時間心機去做，好感恩!」Rex 絕對是真情流露。
Harmony接力：「聰sir一啲都唔嚴厲唔惡死，平時好認真，但有時都會傻下傻下，可以同我哋一齊癲。昨日我哋成班 elite team 去跑遊澳門，完左一齊入賭場體驗下，攞住500蚊，諗住搣下搣下都可以玩得十零廿分鐘，但原來買一鋪大細最少都要落注500蚊，最後冇兩秒我哋全部都要行番晒出嚟，結果係冇體驗。」結果整個牛池灣公園都聽見我們的笑聲。
帶佢哋去公園，好親子日feel。令我可以係數年前俾阿仔係fb unfriend左的創傷中走番出嚟