九月國際賽期間，歐洲主要聯賽轉會窗已經關閉，但沙特聯賽依然積極買人，其中伊蒂哈德(Al Ittihad)就以2500萬歐元從阿積士購入26歲翼鋒貝韋恩(Steven Bergwijn)，雙方簽約到2027年6月，據報導佢嘅年薪高達900萬歐元。
沙特聯賽買人已經唔係大新聞，不過近日荷蘭國家隊領隊朗奴高文(Ronald Koeman)就公開批評球員：「佢喺26歲前往沙特聯賽，好明顯佢缺乏體育層面上嘅野心，國家隊嘅大門對佢已經關上，佢應該知道我會咁樣對佢講。」
「佢大可以繼續留喺阿積士，而效力阿積士都有一定競爭水平。作為球員。你喺26歲，最重要嘅野心應該係體育層面，而唔係金錢方面，喺佢呢個年紀我唔會作出咁樣嘅決定。」
對於國家隊領隊公開批評，貝韋恩係琴日就反駁：「我亦唔想喺高文帶領下踢波。佢作為一個國家隊領隊應該私底下打電話俾我同我講，而我現在要透過電視聽到呢一番言論，過往我同佢係國家隊有好多美好嘅回憶，我對佢非常失望。」
「如果佢有打電話俾我，佢或者會聽到我嘅故事，你點樣可以講出呢一番言論但背後冇同我交談過？」
而談論到為何轉戰沙特聯賽，貝韋恩表示：「當然我會有巨大嘅財富增值，呢方面我唔會講大話。不過喺體育層面上都相當有趣，因為我會同賓施馬、簡迪、法賓奴、迪亞比、彭利拿等球員做隊友。」
故事嘅最後訪問返高文，佢就話理解貝韋恩嘅反應但佢都會言出必行。
高文嘅角度除咗恨鐵不成鋼、認為浪費球員天賦外，相信亦係為咗殺雞儆猴，向其他正值黃金年齡嘅荷蘭球員表達訊息，表達如果佢哋選擇轉戰沙特聯賽就會失去代表國家隊嘅資格，從而保住國家隊嘅實力同人才。
貝韋恩方面被公開批評，當然覺得冤枉，認為領隊無保護佢反而公開背叛，情理上都能夠理解。然而球員喺黃金年齡轉戰沙特聯賽是否正確呢？
體育層面上即使有上述提及嘅「星級球員」做隊友，同聯賽嘅對手水平、集訓效果、天氣、場地、飲食、甚至係入場人數、比賽氣氛遠遠都比唔上歐洲足球，長久落去自身水平一定下降。確實亦有踢緊沙特嘅簡迪出席歐國盃打正選，有謝拉特踢左一年都可以去返阿積士，但有幾多個球員能夠好似佢哋咁樣保持水準？更何況係征戰英超被熱刺退貨嘅貝韋恩？
然而球員生涯有限，除左對國家隊、球隊負責任，每個人都要對自己負責任。跳出球員框架就能理解佢想搵錢嘅想法，正如佢自己提及到：「若果五年後，去到32歲仲會唔會有呢個機會？」
以貝韋恩嘅能力搵20萬鎊週薪或以上嘅機率實在唔高，所以呢個係千載難逢嘅機會。榮譽與金錢，你又會選擇邊個呢？
▼Follow 足球港場
Instagram: https://www.instagram.com/footballarena_hk/