C組關鍵賽事，阿根廷大戰墨西哥，第一輪輸波嘅阿根廷，若然今場落敗予墨西哥就會終結球王美斯嘅最後探戈，因此針對上一場嘅問題，阿根廷作出變陣排出4-3-3陣式，由古度洛迪古斯(Guido Rodriguez)出任防中一職，麥阿里士打同迪保羅就嘗試喺中場作出串連。
上半場阿根廷對墨西哥衝搶攔截形嘅踢法無計可施，只有一兩次中路組織較為乾爽，中場難以推進嘅同時兩邊嘅突破力有限。相反墨西哥爛仔形踢法以犯規阻止進攻，甚至有時候利用罰球作殺著，當中45分鐘維加(Alexis Vega)一記罰球就由門將馬天尼斯接實，但已經係上半場兩隊最像樣嘅攻門，結果上半場兩隊握手言和入更衣室。
廣告（請繼續閱讀本文）
下半場正當阿根廷喺進攻上陷入困局，64分鐘美斯係禁區頂現身攞波，趁住對手並未貼身防守時起腳，割草式地波遠射攻破墨西哥吳鎮宇大門，阿根廷靠住挺身而出嘅美斯以一比零領先，球隊為咗保住勝局馬上轉陣踢三中堅，與此同時落後嘅墨西哥只能壓前搏一搏，結果令阿根廷有更多反擊機會，87分鐘阿根廷一次角球機會，地波開出由後備入替嘅安素費蘭迪斯(Enzo Fernández)兩下插花再擺大位起腳破網，正式終結比賽並協助阿根廷以二比零擊敗墨西哥，美斯世界盃最後探戈尚未結束！
▼ Follow 足球港場頻道
廣告（請繼續閱讀本文）
Instagram: https://www.instagram.com/footballarena_hk/