2022年十大娛樂圈金句 曾志偉解birthday kiss黎明叫歌迷留番啖氣

又到年尾盤點時刻，今年娛樂圈具代表性的金句不多，不過其實聽落又幾好笑。當中當然有「金句王」黎明帶頭，還有曾志偉親自解釋Birthday Kiss新定義，楊明因醉駕入獄卻得到女友莊思明在訪問中平反：「楊明冇用過我一分一毫。」再諗起麥沛東在《正義迴廊》叫人：「屈我啦！」

黎明：「大家唔使嗌，留番啖氣暖身好過啦！」
黎明今個月一連兩日在中環海濱舉行演唱會《Drive In Ultra LOVFINITY Vivienne Tam x Leon Lai Fashion Concert》，撞正天氣寒冷，金句王黎明就叫歌迷唔好嗌：「凍唔凍呀？大家唔使嗌，留番啖氣暖身好過啦！」

《正義迴廊》麥沛東：「屈我啦！」
全句係「屈我啦！屈我啦！我冇問題㗎！」《正義迴廊》票房大收超過$3,900萬，當中麥沛東演出令觀眾印象深刻，一句對白：「屈我啦！屈我啦！我冇問題㗎！」更成為網上MEME圖。

楊千嬅：「我屋企喺香港喎。」
近年長駐大陸工作的楊千嬅，今個月回到香港亞洲國際博覽館舉行兩場《楊千嬅B minor 音樂會2022》。被大陸網民稱為「行走的CD」的她，傳聞演唱會門票滯消，更因開售多時仍然買到8連位門票而被網民稱為「八連教教主」、「手撕黃牛」，更有網民曾在網上希望以楊千嬅飛交換BLACKPINK門票而成為一時熱話。到演唱會期間，有記者問到她會否多點回港，她就回答：「我屋企喺香港喎，我鍾意周圍飛啫。」

肥媽：「每次夜蒲都會被撩」
肥媽(Maria Cordero)下年開show，公開指自己炒股由5000萬輸剩200萬元已經夠嚇人，早前在冬至過後接受傳媒訪問時更爆出驚人事件原來接近70歲的她當晚食完飯去蘭桂坊，自爆：「雖然我成70歲，但次次都有人撩，啲人都盲嘅，通常係鬼先睇唔出我哋幾多歲，試過有鬼佬估我44歲。」

曾志偉：「生日送Birthday Kiss好正常。」
今年10月時曾志偉被拍到為馬來西亞模特兒黎峇菈慶祝生日，對方唱生日歌之餘，還被拍到主動獻吻，未知是否角度問題，片中看到曾志偉錫到黎峇菈嘴邊。之後影片引起熱議，曾志偉隨後出席活動時解釋該吻是出於「禮貌」：「生日送Birthday Kiss好正常。」

莊思明：「楊明冇用過我一分一毫。」
楊明早前上訴不小心駕駛被駁回上訴，需即時監禁18日，未能陪伴家人度聖誕及除夕。不過女友莊思明(Lisa)的不離不棄表現，應該能讓在獄中的楊明感受到一絲暖意。作為家中坐擁10億身家的拿督千金，莊思明早前在社交平台發文回應「食軟飯」傳言：「我可以好肯定咁話比大家聽，楊明冇用過我一分一毫，反而調返轉，我買衫褲鞋襪甚至連去超級市場買屋企日用品嘅所有錢都係楊明俾，因為佢同我講照顧另一半係男人嘅責任。」

《明日戰記》張家輝：「我就係天幕。」
美斯得到世界盃冠軍，張家輝都在2022年成為天幕。電影《明日戰記》中，張家輝雖然只屬客串性質，不過一句：「天幕就係我，我就係天幕。」就令人印象深刻。

古天樂：「如果我哋揀0就永遠只會原地踏步。」
《明日戰記》 票房破8300萬元，投資兼監制的古天樂就在訪問中提到為何投資這樣大在香港做科幻電影：「如果我哋揀0就永遠只會原地踏步，我揀咗1，我願行出呢一步。有一之後就會有2同3，有更大可能性。」

《飯氣攻心》：「屋企人喺邊，邊到就係屋企。」
票房大收超過7500萬的《飯氣攻心》，當中有不少金句，主題就是這句：「屋企人喺邊，邊到就係屋企。」在現今不少人移民的香港，應該能引起好大共鳴。不過其實戲中黃子華指責張繼聰「勾義嫂」在先，王菀之就答：「你係大佬，佢係勾大嫂，佢係二佬你搶佢(鄧麗欣)返來你先係勾二嫂。識唔識數學？」黃子華反駁「勾義嫂」係義氣個義，唔係數目字「二」，這個更好笑。

《季前賽》張繼聰：「後日無埋柳應廷。」
姜濤等MIRROR成員主演的ViuTV電視劇《季前賽》今年都算是矚目劇集，不過當中最多金句的不是一眾MIRROR成員，而是經常爆肚的張繼聰。飾演教練喪波的她則爆出金句：「今日割五城，明日割十城，後日無埋柳應廷。」最難得MIRROR的Edan和Stanley有反應反問︰「邊個柳應廷呀？」