打入全球百大DJ　樂宜簽《造星IV》新女孖住出歌

宅男女神樂宜早前自組工作室，最近更「處女下海」與旗下新人、曾參加《全民造星IV》嘅安希婷一同獻唱新歌《手帕交》仲兼任作曲。樂宜指唱歌係佢嘅弱項，所以今次首次挑戰唱歌非常緊張：「我由細到大都知道自己唱歌麻麻，唔係好聽嗰啲，所以今次重要部分會交畀希婷，不過我當中亦會Rap一段，都係從來冇試過嘅嘢，希望可以挑戰到自己，畀大家睇到另一面嘅我。」又話錄歌當日心情好緊張，嘢都食唔落，但幸好最終NG次數唔係太多，總算超額完成。

另外，樂宜更透露近日打入全球百大DJ排行榜，當中在1至150位中奪得103位，亦係香港首個打入呢個榜嘅DJ：「因為呢個比賽嘅參加資格都需要嚴格批核，所以代表到香港真係好興奮，仲估唔到第一次參加就拎到103位咁好嘅成績，嚟緊下一年我都會繼續參加，希望拎到更好嘅成績，畀其他國家睇到我哋香港嘅DJ都一樣掂。」

東網網站 : https://on.cc/東網Facebook專頁 : https://www.facebook.com/onccnews/