江若琳誕B仔自爆過程有驚險 Oscar升任爸爸狂曬囝囝表情包

Oscar與江若琳和囝囝的第一張三口子照。

江若琳與老公蕭唯展（Oscar）今日在社交網齊齊公布兒子Owen BB已出世，除分享第一張一家三口照外，還有多張囝囝表情包照，網民大讚「好靚仔」！

新手父母透露B仔前日（7日）出世，江若琳則Po出長文：「BB包，我地（哋）終於見面啦！我等左（咗）你好耐啦。雖然你比我預期中早左（咗）兩日出現，明明媽媽我book左（咗）餐廳，食餐好過兩日先施施然生你架（㗎）嘛！唔緊要，以後你既（嘅）人生都可以好似咁，由你自己去決定，我知道呢個係你既（嘅）選擇，我會永遠支持你尊重你，爸爸媽媽會成為你生命中最強大既（嘅）後盾，你突然間要發動，一切黎（嚟）得好快！雖然過程中有少少驚險，但當下我只係知道我要拼盡所有力氣去保護你，將你平安帶到黎（嚟）呢個世界，我地（哋）合力完成啦！give me five！感謝你健健康康，平平安安！」

好靚仔！

感謝完醫生團隊後，江若琳也感謝老公：「最後我想俾最大既（嘅）掌聲BB包爸爸，最初見佢慌慌張張，以為佢流流地，點知到生產整個過程佢一直俾好大既（嘅）支持我，係我耳邊打氣，同我講：咩都唔好擔心，加油push!!!!!!!!!然後佢克服晒佢最驚既（嘅）事，我地（哋）成功啦！BB包平安於6月7日降落地球！謝謝你瀡滑梯黎（嚟）到我地既（嘅）世界，你既（嘅）出現令我人生變得太完整同美好！同大家介紹我個男朋友仔OwenSiu」。
Oscar亦發文表留言：「我陪老婆步入產房，看到什麼是十級痛楚，看到你痛到頭也要爆開了，我分擔不到你的痛，雖然陪着你，但幫不到什麼，只能按着你頸後說加油，很勇敢，很偉大，很有愛的媽媽，辛苦老婆」並對母子承諾：「以後最好的都留給你們，最差的都留給我來撐，歡迎來到地球BB包，Owen Siu要孝順媽媽」。