【CONY開箱】坐定定辦年貨•下篇　玩味蛋卷、養生果醬果蜜

上星期介紹嘅曲奇禮盒同磯煮鮑魚啱唔啱心水呢？唔啱都唔緊要，今日CONY會繼續介紹多3款賀年食品，同樣係本地薑出品，除咗有新意之外，仲有用料天然，講究健康嘅食品，迎合養生潮流。

老字號聯乘

蛋卷係傳統中不可缺少的賀年食品，當賀禮夠得體，亦可作招呼親朋戚友嘅小食。不過總覺得送蛋卷好老土？由本土特色茶葉品牌「Or Tea」聯乘老字號甄沾記推出的禮盒就絕對冇呢種感覺，繽紛喜慶的色調，並以西方油畫技巧繪出帶中國風的圖畫，加以盒上的標語「蛋卷或茶？」玩味十足。

除了外表吸引，禮盒中的產品亦好高質。甄沾記身為百年老字號，造出的蛋卷當然有水準，極之鬆化，更滲出淡淡椰香，配上一杯香醇而茶身細滑嘅茉莉茶、伯爵及南非茶，中和膩感，10條蛋卷眨下眼就食晒！

銷售點：網上商店、3hreeSixty、city’super及崇光百貨

有意頭又滋潤

近年本地手工果醬遍地開花，除咗可以用嚟搽麵包，仲可以用嚟整唔同菜式，好似沙律、甜品，甚至作為烤肉嘅醬汁等，用途多多，買畀鍾意入廚嘅親友，夠特別又夠實用。由一位80後女生創辦的「果醬二三事Jam Story」堅持以時令水果製作果醬，更研發出幾十款口味。佢又特別以雪梨、雪耳、桃膠和桂花，為新年調製出滋潤養顏的「金玉滿堂」果醬，味道清甜，仲食到啖啖雪梨肉和桃膠。

品牌更推出多款賀年禮盒，CONY睇中咗「團團圓圓」禮盒，以如意結配合西式雕花，色調柔和，設計優雅。外表以外，內涵亦十分豐富，有齊「金玉滿堂」果醬、熱情果香橙果醬、鮮果手工曲奇2塊、Jooove Cha 6包，以及木羹一隻。可以同親友一邊食茶點，一邊嘆茶真係幾chill。

銷售點：網上商店、Ztore

養生食品　長輩最愛

送咩畀長輩諗到頭都大埋？蝦子麵又冇新意，先前介紹嘅禮盒又太過新潮？CONY咁體貼，當然有其他推介，「己容坊」嘅即食養生產品和無添加果蜜或者係你另一選擇。前五星級酒店廚師Chris從事飲食業30年，後來因為中風被救回後，開始研製食療，並創立「己容坊」，推出多款健康養生食品。

現時品牌共有十多款產品，於新年買4樽就有免費禮盒包裝，可自由組合。當中「雪燕雪蓮子桃膠」及「川貝陳皮檸檬」係最受歡迎嘅皇牌產品，前者可以直接食用，後者則沖暖水飲用，適合熱癥咳嗽和喉嚨敏感等人士。如果想再特別啲，可以挑選「黑苟杞子紅棗參茶」，又或者係女士必備，健脾暖胃嘅「黑糖老薑」。

銷售點：香港好禮