唔少卡通人物都係我哋嘅童年回憶，細個放學返屋企一定要開電視睇返套卡通片先捨得去做功課！有唔少經典卡通片喺近年更加被翻拍或者出真人版，雖然大家都曾經係卡通迷，但係卡通人物嘅秘密你又知幾多？
1. Hello Kitty
講到童年回憶一定會有Hello Kitty，好似話每個女仔都一定會擁有過至少一件嘅Hello Kitty產品！雖然周圍都見到Hello Kitty，但係佢嘅秘密你又知幾多？Hello Kitty原來唔係貓，佢係一位小女孩。而Hello Kitty都並非佢嘅原名，佢嘅原名係Kitty White，出生於倫敦郊區，身高5個蘋果，體重3個蘋果。至於點解佢無嘴？Sanrio官方話係因為Hello Kitty透過心對話，所以唔受限於任何特定語言。
2. 蛋黃哥
蛋黃個懶洋洋嘅體態於近年極受歡迎！但係究竟蛋黃哥係男定係女呢？原來佢係無性別㗎，加上每一顆蛋黃哥都係獨一無二，所以每日見到嘅蛋黃哥都係唔同人！
3. 布甸狗
布甸狗究竟係布甸定係狗？布甸狗原來係狗嚟，設計師用咗金毛尋回犬作為設計藍本。而佢頭頂嘅啡色帽係因為布甸都係黃色同啡色嘅顏色組合，所以布甸狗黃色圓碌碌嘅身加埋啡色嘅帽就會更似一嚿布甸啦！
4. 玉桂狗
點解佢無鼻？設計師解釋話想玉桂狗嘅設計簡單啲，因為從無嘴嘅Hello Kitty身上觀察到愈簡單嘅設計，辨識度愈高亦愈容易受歡迎，所以專登唔畫鼻！至於點解佢嘅眼睛係藍色係因為玉桂狗係喺天上誕生所以眼睛嘅顏色會特別唔同！
5. 美人魚
講起迪士尼公主，好多女仔都話鍾意美人魚，但係你又知唔知美人魚係根據邊個畫出嚟㗎呢？佢並唔係憑空想像然後畫出嚟㗎，美人魚係參考美國藝員Alyssa Milano畫出嚟！
6. 阿拉丁
至於阿拉丁就係根據大家都好熟悉嘅男藝員Tom Cruise 畫出嚟！
7. 美女與野獸
就算去到美女與野獸入面嘅野獸都並非憑空想像！美女與野獸嘅動畫師指出野獸係由7種動物組成：獅子、水牛、猩猩、人類、野豬、熊同狼！
8. 哆啦A夢
哆啦A夢細過幾乎日日睇，但佢嘅秘密你又知幾多？哆啦A夢身高129cm，出生年份係未來嘅2112年。呢隻機機械貓嘅主要開關原來喺紅色嘅尾巴度，如果你拉哆啦A夢嘅尾巴佢就會停止運作啦！
9. 比卡超
寵物小精靈入面嘅比卡超身高40cm，體重6KG，比卡超之所以叫比卡超係因為「Pika」喺日文入面解作電火花嘅響聲，而「chu」就係解作老鼠嘅響聲，夾埋就係Pikachu啦！
10. Kakao Friends Ryan
雖然Ryan望落似一隻熊，但其實佢係一隻獅子！Ryan嘅韓文發音係「라이언」（La Yi on）， 係同韓文發音嘅Lion（獅子）一模一樣！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**