今年有唔少電影都係動畫真人化，包括《POKÉMON神探Pikachu》！電影自從首波預告之後產生唔少迴響，其中一個原因當然係主角Pikachu由「死侍」Ryan Reynolds配音，而香港版更加由「暴龍哥」鄭中基搞鬼聲演，好多POKÉMON粉絲都對電影有唔少期待，入場前當然要做少少功課啦！
1.《POKÉMON神探Pikachu》係一個全新故事
大家可能會期待電影同動畫版有關係，但睇過預告都會知道唔會有小智出現。
電影根據遊戲《Great Detective Pikachu》改編，而導演Rob Letterman接受訪問時都有透露點解冇小智：Pokémon公司表示過去已經有太多作品講述小智嘅故事，希望真人版電影可以有全新角色。導演睇完《Great Detective Pikachu》故事背景都覺得呢個方向幾有趣，所以決定以Pikachu查案嘅方向出發。
而電影就係講述神探Harry Goodman神秘失蹤，兒子Tim決心查出真相並得到爸爸嘅精靈助手「神探Pikachu」協助調查，間接發現驚天陰謀！
2. 超過60種小精靈現身電影
故事發生於POKÉMON同人類共同生活嘅萊姆市，除咗Pikachu之外，仲有好多熟悉、唔同世代嘅POKÉMON都會陸續登場，種類超過60種。當中比較搶戲份嘅包括：
可達鴨
布魯
卡拉卡拉
噴火龍
吸盤小丑
大舌頭
超夢夢
長尾怪手
初代「御三家」都會出現！
3. Ryan Reynolds揮低強勁對手 「死侍式」配音有原因
好多網民都留言話睇到美版預告第一個反應係：Pikachu有「死侍」影子！
其實Ryan Reynolds都有擔心過呢個問題，佢接受訪問時透露配音初期有問過好唔好變聲配音，話晒「死侍」太深入民心，佢都擔心會影響呢個闔家歡電影，不過劇組表示用返佢自己把聲就得，所以加埋特技效果之後，就出現宜家呢個咁搞鬼嘅Pikachu！
唔講唔知，原來當初Pikachu配音人選並唔係Ryan Reynolds一枝獨秀，佢係經過面試揮低Hugh Jackman、Dwayne Johnson同Danny Devito先贏得呢個角色，真係好難想像如果Pikachu由The Rock聲演會係點！
4. 電影大部分場景實地拍攝
宜家好多電影都會用綠幕加CG拍攝，呢套電影源於遊戲動漫，觀眾自然覺得會用好多動畫特技，但男主角Justice Smith透露拍攝期間好多實地拍攝，實際用綠幕嘅場景其實好少，導演只係後期加上濾鏡效果，所以畫面真實感會更高，觀眾投入度都會大大提升。
5. 《POKÉMON神探Pikachu》星光熠熠
除咗Ryan Reynolds之外，男主角Justice Smith之前參演過《侏羅紀世界：迷失國度》知名度大大提升，電影更加有日本影帝渡邊謙加盟，連製作班底都係金像級人馬，令電影視覺效果更加自然。
入場前記得溫溫POKÉMON精靈圖鑑，睇嘅時候就會更興奮！
撰文：沙拉