鼠年到了，每年拜年逗利是嘅時候又到了！大家諗好你地嘅賀年look未？未嘅話唔緊要，即刻參考以下呢堆明星點著法，一定可以啟發到大家！
明星拜年look 1. 陳豪、陳茵媺
最經典嘅明星賀年look又點會少得陳氏伉儷陳豪、陳茵媺呢？呢對模範夫妻人前人後都大show恩愛，實在係閃盲一眾單身狗。
新年流流仲要著哂唐裝，喺大大棵桃花樹下面影全家褔，你睇大大細細都笑到見牙唔見眼，連一家之主陳豪成塊面都寫上「幸福」兩個字，就知點著都係其次，最緊要係一家人齊齊整整啦。
明星拜年look 2. 陳小春、應采兒
另一對陳氏伉儷陳小春、應采兒，上一個豬年都有應應節出po同大家賀一賀年，但就貫徹一向搞鬼嘅風格，唔係著傳統唐裝，而係著紅色casual裝，不過最突顯出陳氏一家嘅鬼馬風格嘅，絕對非小小春Jasper莫屬！竟然著上 孖寶兄弟cosplay裝，唔知係佢自己要求定阿媽應采兒要求呢？
明星拜年look 3. 黎諾㦤
神之馬壯近幾年人氣keep住上升，自從娶咗老婆李潔瑩同生埋小春雞之後，星途更見一帆風順，新年咁喜慶嘅日子當然都要湊湊熱鬧，上年豬年佢就孖住老婆同仔仔一齊紅噹噹影相。雖然兩公婆都係casual紅衛衣，但小春雞就著金色唐裝，相當英氣，又夠貼切！
明星拜年look 4. 楊千嬅、丁子高
丁氏伉儷嘅賀年全家褔就完全反傳統走西式，超casual wear，千嬅戴紳士帽之餘，仲要用埋英文寫「恭喜發財」，完全貫徹佢兩公婆鍾意搞創意嘅性格，大家又點睇呢？
明星拜年look 5. Ella @SHE
台灣代表方面，SHE嘅Ella都唔執輸，上年新正頭都有影個全家福，全家就夾埋著紅色pattern恤衫，又係另一種風格，潮味甚濃。勁寶雖然嗰陣仲咬住奶嘴，不過都唔及Ella愛犬咁搶鏡。
明星拜年look 6. 賈靜雯
台灣另一好媽媽代表賈靜雯，上年雖然沒po全家福，但係派出咘咘同波妞嘅可愛賀年look，見到兩個小朋友賣萌咁可愛，大家都上年豬年都一定如賈靜雯所講的「豬」事順利。
明星拜年look 7.謝霆鋒、謝婷婷
以上嘅經典，都一定唔及佢地咁經典中嘅經典。以前每逢過年過節，謝賢一定拉著一對寶貝仔女謝霆鋒、謝婷婷著到喜喜慶慶同大家拜年。
不過唔知霆鋒見返自己咁嘅樣，又會有咩感覺呢？
生咗BB嘅婷婷，同細個嘅樣都真係……冇乜大分別嘅~
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**