Yahoo 雅虎香港今日公佈咗2018年「Yahoo 全年搜尋人氣榜」，唔知大家有無搜尋過呢？
「十大熱搜潮流用語」嘅名單如下：
1.「係愛呀？定係責任？」
今年6月7日，熱帶風暴艾雲尼吹襲香港，天文台懸掛3號強風信號，並先後發出黃色及紅色暴雨警告，一位地盤工友忽發奇想拍攝短片，問另一位工友︰「年青人，究竟有咩動力，驅使你喺呢個暴雨下工作呀？係愛呀？定係責任？」
2.「佛系」
「佛系」係一種文化現象，反映看破紅塵、唔理世俗，隨心而行，安於平淡生活嘅一種生活狀態同態度。
3.「Skr」
出自內地節目—「中國新說唱」，製作人吳亦凡經常喺節目中講：「skr」，非常洗腦，繼「freestyle」之後，又一力作！
「Skr」表示佩服，有讚賞之意。
4.「啱呀！」
係時下年輕人表達同意嘅口頭禪。可以用嚟結束話題。任何情況都用到。
5.「係愛啊！哈利！」
來自電影《哈利波特》配音版嘅一句對白，形容好有愛嘅事。
6.「精神」
原本出自賣倫敦金人士，佢哋一搵到買家入錢，就會喺群組講：「精神！爆數！」
7.「Chill」
「chill」係一種生活態度，代表好嘆～
8.「食雞」
係一隻喺2017年由南韓推出嘅多人網上射擊遊戲《絕地求生》（英文：PlayerUnknown's Battlegrounds）。 贏家打贏會見到句「winner winner, chicken dinner」，意思係贏家今晚有得食雞做晚餐，所以玩家就叫呢隻遊戲做《食雞》。
9.「666」
「666」普通話諧音「牛牛牛」或者「溜溜溜」，內地網民喺玩遊戲嘅時候會用嚟稱讚對方玩得好熟練。
10.「真心咩？」
表示對事情感到驚訝，反覆確定真實性。
除咗「十大潮語」，仲有公布「十大網絡紅人」～
「十大網絡紅人」嘅第一位就係「任何仁」喇！消防處創作嘅任何仁，全身藍色嘅任何仁，向大眾宣傳急救資訊，推出後即刻成為網絡熱話！人氣高企，難怪登上榜首！
第二位就係喺youtube上行為出位嘅龍心喇！
3位係黑面跳舞嘅落選港姐工藤佑采，佢仲同張敬軒交換頭像添！
4位汪明荃，汪阿姐今年一加入ig，即刻以獨特嘅tag人技巧「汪阿tag」成功帶領潮流，4位當之無愧！
5位係同樣出位嘅劉馬車，沉寂一段時間後重出江湖，登上第五位。
6位飯腳Karen憑住一日成功約到11位男士食飯而紅遍網絡。
7位會計妹，有上youtube嘅你應該都睇過呢個廣告，像真度極高嘅動畫人物。
8位就係會計妹個fd創業龍喇！
9位係同屬政府KOL清潔龍阿德。
10位係 youtuber Catgirl，大家有無睇過佢啲片呢？佢最吸引人嘅地方就係佢嘅自信！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）