筆者讀書年代（08年拔萃男書院畢業）成日都聽到人講讀國際學校就係讀唔到書，通常係留班生或者畀人踢出校嘅學生先走去讀！讀到書嘅一定係考舊時行緊嘅A Level預科制度。
然而，依家DSE文憑試一試定生死，而且IB大行其道，今時唔同往日喇！好多傳統名校例如筆者母校，聖保羅男女書院、聖士提反書院等等，都有IB國際學校課程，而且收生極度嚴謹，唔係想讀就有得讀！聽聞要全級頭50名先有機會面試，你仲話讀唔到書先走去讀？不過大家都心照，因為唔係咁，點會有學校全校IB平均分41以上（IB滿分45分，全球平均分：29分），IB 40分已經達到劍橋大學嘅收生基本要求。
精英制度下，有人想讀入唔到，但係亦都有人被IB學校取錄，心大心細，唔知點揀，留喺DSE定係讀IB呢？相信大家都聽過李寶樁書院（LPC），如果無聽過唔緊要，總之係一間需要過5關斬6將，學生仲要文武雙全先會收嘅國際學校之中嘅名校！點解佢咁出名？因為自2013年累計攞40分以上嘅學生接近200人！而且人材輩出，例如歌手莫文蔚、港澳事務辦公室主任王光亞、前威爾斯親王醫院行政總監馮康等都係舊生！不過咁吸引嘅Offer，都有家長猶疑讀唔讀好！皆因呢位家長個女喺女拔萃讀書（女拔無IB課程），於校內考試名列前茅，但係LPC又收左佢，家長就煩惱明明DSE讀得好好哋，要唔要冒險轉讀IB呢？聽人講IB科目好似仲難過DSE，但係LPC難得收咗，又無理由唔讀！所以打嚟筆者嘅教育中心問個究竟，筆者順便喺度同大家分享一下，IB科目係咩一回事啦！
先講IB數學同DSE嘅分別，DSE Core Math 唔使讀Vector，Probability Distribution概率分布，微積分（Calculus) ，但係IB學生一科Standard Level Math （中等數學）已經要讀晒！DSE M1先會讀Distribution，M2讀到Vector，所以課程好散。IB 高等數學（MATH HIGHER LEVEL）入面嘅Option （選修科） 仲難！例如Discrete Math要學埋大學程度嘅數學，例如Chinese Remainder Theorem ，即係舊時孫子兵法士兵陣列排序，係有數得計㗎！抽象啲嘅仲有SETS，要學埋De Morgan Theorem，Cayley Table，總之就係DSE掂都唔會掂嘅章節。
所以，仲話本地學生數學去到國際學校一定贏晒？依家就真係未必！不過，筆者都係建議嗰位家長嘅小朋友轉讀IB。我哋成日話，讀DSE就係爭入大學，但係讀IB，就係爭入好嘅大學。喺IB嘅制度，基本上係接近100%入大學率，因為IB學生嘅優勢係成績國際認可，就算香港無大學Offer，外國名牌大學都爭住收。LPC學費唔平，既然家長畀得起每年學費約HK$165,500，何必同DSE學生爭嗰萬零個香港大學學位呢？
（文章由HKExcel IB Specialist，https://www.hkexcel.org 提供）
Edward
HKExcel IB Specialist共同創辦人，教育超過三千名IB學生
拔萃男書院畢業生，英國高考取得5A成績
曾獲邀到多間IB學校分享應試心得
曾撰寫「IB攻略」在書展大賣