56歲美魔女羅霖(Candy)與前夫劉坤銘離婚，曾過富太生活的她為生計和3個兒子而復出幕前，出寫真、拍片、做生意搵真銀養家活兒。作為單親媽的羅霖一直努力照顧家庭，為了供兒子海外升學，更把物業賣掉，今苦盡甘來，大仔理大畢業，次子成家立室，終享兒孫福。她有3個人生態度，可作教材，教孩子樂觀處世。
羅霖苦盡甘來 大仔大學畢業 次子成家立室
圈中大家認的美魔女羅霖，成單親媽媽近10年，一直獨力養大3名兒子劉子榕（Nathan）、劉子熙（Jordan）及劉子晉（Jonathan），擔起成頭家。去年，羅霖22歲二仔Jordan先在美國大學畢業，更在當地成婚，組織家庭。日前，再又好消息，曾經一度輟學的25歲大仔Nathan終在香港理工大學畢業，羅霖可謂苦盡甘來。
大仔畢業禮當日，56歲的羅霖打扮大方得體，也十分青春。難得大仔終於完成學業，羅霖當然欣喜萬分，並在社交平台分享喜悅。照片中的羅霖穿上短裙，襯上長靴，十分青春。她還留言表示，因為疫情，延遲了大學畢業典禮，感恩最後能夠順利舉行！祝願Nathan未來一切平安喜樂順利！
3個人生觀助孩子樂觀成長
1.支持孩子信
其實大仔Nathan曾經輟學和迷失，求學之路遇過不少挫折。到海外升學前，Nathan在港就讀基督教國際學校（ICS），後來他去了英美升學，修過媒體、設計和法律等科目。後來，Nathan發現自己不愛法律，於是大膽的選擇輟學，再返香港入讀理工大學商業設計。
羅霖曾表示：「小朋友好有主見，但亦經唔起挫折，遇到困難可能會放棄，要不斷支持、包容、鼓勵，好多嘅愛同耐性，加埋我要做嘢，有時都幾心力交瘁，但作為媽咪，永遠都係支持、唔放棄佢哋，譬如大仔喺外國讀完三年，本來仲有一年畢業，但佢話要轉major(主修科目)，要由頭嚟過，當時我覺得：『你咪嘥咗我啲錢？七位數字喎！我真係做幾份工捱通宵，做到喊㗎喎！』我沉澱，問自己：『你想個仔健康快樂，定繼續讀佢唔開心嘅嘢？』咁我寧願揀我自己辛苦啲，但我同大仔講：『你唔好成日轉，因為我仲有兩個細佬要供！』」
為此，羅霖也曾呻過兒子浪費了3年過百萬的學費，但她還是支持大仔做想做的事。羅霖也曾在電台節目《舊日的足跡》接受車淑梅訪問時表示錢沒有了，可以再賺回來，無論如何也得供孩子讀書。
2.經濟壓力再大也盡全力支持孩子
離婚後，羅霖的生活迎來巨變，由富太生活，一下子要靠自己養3孩之家。她曾在訪問中表示首先要面對的是經濟上的困難：「尤其係頭幾個月，我真係咩都無、由零開始，只可以同細仔搬番我媽咪度住，當時我同細仔瞓一張床，細仔都問我點解要住咁細嘅房、瞓埋一張床，我話：『你畀啲時間媽咪，我會努力做嘢，搬出去租屋住。』嗰刻我下定決心，到佢瞓著我就喊。」
羅霖直言：「三個仔學費、生活費各樣支出都好大，尤其係去國外留學，每年加埋食宿三十幾萬，去美國更加貴，每年接近五十萬。當初分開，協議我負責生活費，佢(前夫)負責學費，但過咗都無一年，佢話淨係負責兩個大仔三分一學費，對我嚟講壓力好大。三個仔都生性，有時做吓暑期工，我最希望佢哋可以經濟獨立，因為講真我年紀唔細，都唔知可以喺呢行做幾耐，有時壓力大，我都會喊住咁祈禱。」前夫除了不想負責任，更想從羅霖身上獲取更多，離婚後半年，再打官司。
羅霖表示起初只是帶細仔離家，不過後來大仔和二仔都主動執行李去找她，最她一人獨力撫養三子。她曾在訪問中表示：「離婚後我沒想過復出，一來自己年紀好大，只想和朋友夾錢做生意。不過離婚後剛好有廣告和工作找我，於是雙線發展。」
美魔女羅霖離婚後獨力照顧3兒子
3.離婚後半年最徬徨 學習釋懷
每個女人都不希望走上離婚這一步，羅霖都一樣，1996年婚後與商人劉坤銘誕下三子，專心照顧家庭，十多年之後，Candy發現與丈夫未必能走到白頭，「其實離婚都醞釀咗幾年，因為咩事唔想講，但三個仔一直睇到，知道父母間發生咩事。」他們決定分開，首半年是Candy最難捱的日子，「我40幾歲先離婚，個人好冇自信心，前路茫茫，30幾歲都話重新嚟過，40幾歲真係好徬徨，嗰排成日匿埋喊。」
身為公眾人物，要面對輿論壓力，返回家中，在兒子面前亦要扮鎮定，別讓他們看見她徬徨的樣子，「我負責同小朋友解釋成件事，強調我哋作為大人，一定會為你哋着想，係難接受，但佢哋都明白。冇小朋友離婚好易處理，但有小朋友就複雜好多，無人會想離婚，即使分開都希望做到朋友，但我哋關係同之前一樣，未做得番朋友，希望時間沖淡後會有改善。」
3個仔各有性格
細仔最支持復出 欲做英雄保護媽媽
在半年的低潮期，親友關心和宗教信仰，帶領她走出低谷，「我每晚都祈禱，為咗三個仔，我一定要快啲企番起身，慢慢我都諗通咗，每個人喺不同階段都會遇到困難，為學業、為事業、為家庭，人一定要有希望，任何階段都唔應該放棄。」她勉勵同路人，有心事一定要告訴親友，切勿鑽牛角尖，走上困局，「當時我得到好多親友支持、開解我，我先可以走下去，開心又一日，唔開心又一日，凡事都有兩面，睇吓你點揀，有心事一定要同親友商量，多個人多個意見，講出嚟會舒服好多。」
徬徨過後，Candy覺得女人要自強，必須有個錢傍身，決定復出幕前搵銀，接拍性感戲也在所不計，事前花了不少心機向三子解釋，大仔Nathan已成人，懂得分辨；二仔Jordan正值反叛期，比較介懷；反而細仔最開通，想入場支持媽媽演出，可惜未夠秤。
孻仔子晉，性格乖巧樂天，對媽媽亦頗黐身，他起初不習慣與爸爸哥哥分開生活，常要求同住，Candy為免影響他的成長，逢周五至周日帶他與哥哥食飯、打機，一講起打機子晉興奮起來：「我同大哥玩Wii，同二哥玩PS4同Xbox，我哋仲一齊儲閃卡！」Candy笑指三兄弟常相約睇戲，由大哥帶隊，子晉最喜歡睇英雄人物，超人、蝙蝠俠和《變形金剛》中的柯柏文，都是他的至愛，希望將來自己都英雄化身，「我好鍾意救人，仲可以保護媽咪！」Candy聞言感到很心甜，「佢好嗲，
好識氹我開心。」
做了單親媽媽後，集中照顧子晉一人，工作量增加之餘，放工還要跟進他的功課，「一返到去未食飯就即刻睇功課先，等佢瞓咗我先食飯，所以個人就攰啲。」
大仔初拍拖 二仔最反叛
三個兒子的性格各有不同，Nathan已長大成人， 不斷為前途摸索， 留港升大學， 還是外國留學？讀心理學， 抑或大眾傳媒？經常舉棋不定，最近他決定到英國升讀蘭卡斯特大學（Lancaster University ）， 修讀Media andCultural Studies，母子要分隔兩地，Candy最擔心他學壞吸毒，因大麻在外國普遍，惟有叫他謹慎交友。
不過，講起Nathan拍拖，Candy就幾放心，「我一直唔俾佢拍拖，直到17、18歲先俾，所以佢同女朋友都係識咗冇耐，我見過個女仔，性格開朗純情，我鍾意呢類女仔。拍拖冇所謂，唔影響學業就得，最重要唔好一腳踏幾船。」至於二仔Jordan仍處於反叛期，Candy指最重要有耐性包容他，「青少年約10歲至12歲就出現反叛期，大仔比較文靜理智，反叛期只係一年，但二仔長達四年，好多嘢佢以為自己啱晒，好易諗埋一邊同發嬲，做父母千祈唔好頂撞佢，必須忍耐同多溝通。」
「美魔女」沒化妝 阿仔唔慣
年過50，Candy重拾自信積極保養，贏得「美魔女」的稱號， 在一個修身廣告中， 盡顯美好身段，Candy笑言子晉初初對此稱號充滿疑惑，解釋了一番，「我話呢個稱號係好事嚟㗎，大家讚媽媽keep得好，佢知道後都好開心。」每次出外工作，Candy都悉心打扮，連訪問她也一絲不苟，執到最正以尊重對方，連三個仔都睇慣她的隆重打扮，輕鬆casual look反而看不慣，她笑說：「有次我同佢哋去超市買嘢，着件tee、輕便褲就出去，冇乜化妝， 佢哋覺得奇怪問我『你咁就出街喇？』係呀，去超級市場簡簡單單就得啦，原來佢哋睇唔慣我咁樣出街，哈哈。」
Candy未選亞姐前， 八十年代她曾任空姐，自此學識護膚之道，「嗰陣成日飛去唔同國家，要適應唔同天氣，好似今日喺加拿大-3度，過兩日又飛去曼谷30度，而且機艙乾燥。」她會準備夏、冬兩set護膚品，至今都適用，有時都要飛往不同國家出席活動。她更提醒女士們要勤敷保濕面膜，一星期四至五次。
養顏之道 重早餐湯水
至於飲食和睡眠更重要，「瞓得唔好，食幾多補品都冇用。」她奉行少食多餐，每朝早餐最重要，「刷完牙先飲一杯暖檸水，加一片檸檬就夠，空肚飲唔好咁酸， 隔咗四五分鐘後先開始食早餐， 要多纖維， 我推薦牛奶煮麥皮，加兩隻烚蛋，唔要蛋黃，再加一碗白粥。」每晚她更必備湯水，長期進食雪耳，含高蛋白質和氨基酸，能養陰補肺，又平又養顏，她最常煲南北杏燉雪耳，可以加入木瓜和冰糖。
Candy謙稱，許多圈中女星都keep得好好， 始終都要面對公眾，必須積極保養，「keep得靚自己都開心， 睇落精神啲、健康啲，但保養一定要內外都做，心態樂觀，保持身體健康先會真正美麗。」