識飲識食識玩！十大生活Youtuber，Ming仔第幾名？

再忙再攰，都要抖抖

香港人，喺生活壓力方面，一向都係超英趕美嘅，國際上數一數二嘅都市。堅尼系數，第一名。行路速度，第一名。人口密度，第一名。樓價，好似正正常常返工，返幾世嘅話，應該可以供晒嘅。要上大學，中英數通要樣樣得，入到大學得兩成，入到都可能係乞食科。返工嘅人工增幅永遠都追唔到通貨膨脹，日日開OT搞到無晒人生。唉，喺香港好似地獄咁？No way！其實香港人咁忙，要輕鬆吓都唔係咁簡單，反而要學吓點樣哄自己開心，對自己好少少。今日DailyView就同各位香港人介紹，十大識飲識食識玩嘅Youtuber，睇吓佢哋咁識生活，值得我哋學吓。

DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。

10 托哥 Torres

——打破刻板印象

香港Youtuber托哥 Torres，早喺佢經營個人Youtube channel之前，已經係讀緊Year one俾中國土豆網「神街訪」嘅製作人相中，成為主持人，訪問內容圍繞戀愛觀、性愛觀等，內地廣為流傳，封為「街坊熱潮始祖」。托哥 Torres之後自己拍片，內容題材都係傾向同呢方面有關，好多影片都拍得相當搞笑，近年仲識咗個外國女仔拍拖，其中外國人、香港人嘅唔同，更係好受歡迎。想輕鬆吓，了解更多愛情方面唔同人嘅睇法？即刻睇睇托哥喇！

image source:

9 西DorSi

——飲食評價中肯

西DorSi，西多士，一睇個名就知相當邪惡，識食識飲喇！無錯，香港Youtuber西DorSi，係專門以飲食評論做題材嘅。相對好多會出真樣嘅Youtuber，西DorSi就相當神秘，直到上年之前，都無人知佢嘅真人係點。因為西DorSi話，驚有餐廳因為影片識得佢，而令佢得到較好嘅待遇，唔可以作出中肯評論。咁細心諗得咁多，難怪網民對佢嘅食評致力讚，個個都話，跟佢去食嘢，就一定會食到好西咁話。香港人，係時候食好嘢！好似佢呢條片咁，用最抵嘅價格，食最好嘅嘢。

image source:

8 屎嫂程程

——人生百態

如果唔識屎嫂程程，相信睇到佢個名，都會覺得呢個名好怪。屎嫂程程，原來個名係因為另一位知名打機Youbter屎萊姆而改嘅，因為程程係佢嘅老婆，所以咪叫屎嫂程程囉！相對屎萊姆，屎嫂程程主力拍嘅係VLOG、開箱、煮食同寵物等題材，相當貼近香港人嘅日常生活。成功男人背後，總要有一位女人，但到底呢位女人嘅生活係點呢？2019年6月，屎嫂程程生咗粒仔，正式走向人生另一個階段，周不時仲拍埋親子題材，好溫馨呀。

image source:

7 Rock哥

——憤怒、自傲、誠實

Rock哥，可能係全香港最有個人特色嘅Youtuber！皆因佢嘅樣子相當粗獷，真係可以講句：「你啲咁出色嘅男人，無論喺邊度，都好似漆黑中嘅螢火蟲一樣，咁鮮明，咁出眾！」Rock哥唔拍飲飲食食，而係專門拍破解騙案嘅影片，用snapchat隱藏身份，好似流言終結者咁勁。Channel開咗一年幾，已經有成十幾萬Follower，證明香港人真係好認同佢嘅言行。「美容妹」騙局？自稱「溝女專家」嘅疑似騙徒？全部都俾佢識得晒，真男人。

image source:

6 Alfred Chan

——有碗話碗

飲食評論，你有個嘴，我又有個嘴，青菜蘿蔔，各有喜好，點解我要同意你先？所以有好多人拍飲食片，但都得唔到好嘅回應，仲會有人懷疑拍片收咗錢。但Alfred Chan成功突破種種困難，成為香港知名飲食Youtuber，就係講求「有碗話碗，有碟話碟」，唔會整色整水，客觀咁分析唔同食物嘅味道。除咗飲食，佢不時都會拍旅遊、打機、開箱等題材嘅片，分享自己日常生活點滴。想知香港邊到最好嘅自助餐、和牛？一齊睇睇佢嘅片。

image source:

5 Emi Wong

——健身女神

香港人，出得嚟社會工作三五七年，無嘅並唔係錢，而係最重要嘅，健康。「秒速捉得緊了／而皮膚竟偷偷鬆了」，再有錢，可能都換唔返自己嘅健康身體。近年香港人愈嚟愈流行健身，做運動，都係為咗要有返理想嘅健康啫。Emi Wong，認證高級私人體式能教練，因為早年工作不順，決定上傳第一支影片到YouTube，結果改變一生，成為咗廣為人知嘅健身Youtuber。近年佢仲做埋生活型YouTube，健身之外，仲幫大家健埋心，開開心心。

image source:

4 Mira

——韓國達人

香港近年最興咩潮流？唔係歐美，唔係日本，而係韓國文化！自從韓國娛樂明星進軍香港，香港少男少女都愛上韓國，一時之間對呢個地方充滿好奇，想更加了解韓國。Mira，土生土長香港人，去咗韓國讀書定居，精通韓文，拍片為大家介紹韓國嘅地方、文化。2016年，佢伷因為短時間內獲得逾50萬訂閱者，被Google HK評為「年度香港成長最快的YouTube新星」。近年佢仲去埋台灣、日本，介紹埋呢兩個地方嘅旅遊資訊，想出去玩，睇佢喇！

image source:

3 Ming仔

——找數真漢子

Ming仔，本名梁嘉銘，係香港現今知名Youtber，近年仲涉足影視圈，先後拍攝《溝女不離三兄弟》、《小姐誘心》、《Delete愛人》等電影和《三一如三》等電視劇。2010年起以「Ming仔」嘅身分拍攝短片《每天自戀多一些》，至今已經累積近四十萬訂閱者。曾經佢嘅觀眾叫佢去澳門玩笨豬跳，Ming仔即時照做，言出必行，咩都敢做，難怪多年來都咁多人做佢嘅Fans。不過最近佢講錯嘢，即時無咗大批Fans，喺到唯有同Ming仔講聲加油喇！

image source:

2 Coffee林芊妤

——瑜伽導師

林芊妤，英文名Coffee，2008年獲無綫電視監製錢國偉賞識而入行，其中參演《畢打自己人》，入面做性感模特兒Aima，引嚟唔少觀眾關注。2014年因為緋聞事件，同TVB和平解約，不過唔代表佢放棄繼續發展娛樂事業！無耐，佢成為咗瑜伽教練，更係圈中知名嘅瑜伽導師，2019年正式做Youtuber，教教大家點樣Keep fit。Coffee嘅身形咁好，有前有後，充滿陽光魅力，教學又咁出色，當然有大把男女睇佢學做瑜伽喇！

image source:

1 煮家男人 Bob's Your Uncle

——絕世好男人

煮家男人Bob叔，Youtube channel坐擁成五十萬以上訂閱者，可謂香港飲食類型第一把交椅。講食講飲，大把人都識喇，點解Bob叔咁成功先？皆因Bob叔唔單止識食，仲識煮！識煮都唔係重點，仲勁嘅係Bob叔直頭好似電台DJ咁，條條片都成日分享自己對唔同事情嘅睇法，其中一條講到自己嘅床事，對女人好有自己嘅方法，即時俾網民力讚佢係絕世好男人。Bob叔影片仲要好有品味，中英字幕，去郵輪咁，講時事又有見解，真係好勁！

image source:

分析說明：

本研究資料由《KEYPO大數據關鍵引擎》提供，分析時間範圍為2018年11月20日至2019年11月21日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『香港十大生活型Youtuber』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。