「時裝嘅嘢你識條鐵」呢句嘢，究竟係由幾時開始出現，真係好難去考究，但最常見用都莫過於連登（LIHKG）友，但最近喺連登竟然出現咗一個認真討論時裝嘅Post，仲要傾咗幾十版傾到爆Po再開新Po，究竟連登友心目中乜嘢係時裝？又有咩咁值得討論？係膚淺講Supreme、LV乜乜乜定深度文，即睇下面佢哋講得最多嘅牌子，有興趣嘅亦可以去連結同連登友吹埋一份！
撰文: K.P.｜圖片來源：LIHKG、Stone Island｜編輯：海月
【時裝討論】連登仔認真講時裝？ 排名第一竟然係呢個牌子！
連登友心目中排名第5：Stone Island
Stone Island呢個英國機能性品牌，因為近年同Nike、Supreme嘅聯名，而喺香港變成秋冬季必備嘅「潮牌」，但連登友一言驚醒洛克人，話喺英國係其實係一個好common嘅牌子，咁又係嘅，明明我睇英超果陣都成日見曼城領隊哥迪奧拿著Stone Island，唔通佢又係潮童咩！
連登友心目中排名第4：HELMUT LANG
HELMUT LANG可能大家會少聽啲，HELMUT LANG其實喺90年代係極前極嘅牌子，不過自從2004年畀PRADA集團完全收購後，呢個牌子轉過幾個設計師都搞唔掂，雖然連卡佛至今仍然係香港獨家代理，但老實講應該唔太賣得。
連登友心目中排名第3：LEMAIRE
曾經做過Hermès創作總監嘅Christophe Lemaire，雖然呢位簡約系設計師嘅地位，唔及Jil Sander同A.P.C.創辦人Jean Touitou，但因為近年同UNIQLO合作嘅「UNIQLO U」，而令大眾市場認識到呢位設計師。連登友亦針對UNIQLO U同Christophe Lemaire個人品牌LEMAIRE為例子，等大家去了解高級時裝同大眾化成衣嘅分別同關聯性。
連登友心目中排名第2：Maison Margiela
鍾意時裝嘅人，有幾個品牌永遠走唔甩，香港俗稱「罵治」嘅Maison Margiela就係其中一個，原本以為創辦人Martin Margiela離任後嘅「罵治」會變質，點知現任創作總監John Galliano唔單止維持到本來嘅風格，又有一啲小變奏令更加人入坑；而連登友喺呢個Po入面狂討論嘅，就係究竟入唔人手Maison Margiela同Reebok對聯名波鞋，留意返呢對鞋係啱啱1月30號先正式發售，真係跟得好貼架呢班連登友！
連登友心目中排名第1：：yohji yamamoto
有「禪師」之稱嘅日本設計師山本耀司（Yohji Yamamoto），香港人最熟悉嘅莫過於佢同adidas合作嘅「Y-3」，不過連登友明顯不屑Y-3嘅設計，而佢哋集中討論都係行Fashion Show嘅正線yohji yamamoto POUR HOMME，又或者可以去邊度搵返十幾廿年前嘅yohji古著。
