拎定紙巾抹鼻血
所謂「穿衣顯瘦，脫衣有肉」，唔少演員本身已經有迷人外表，偏偏仲有完美身材。外表睇落冷漠，對世界上一切事物都無興趣，但其實私下熱情如火，身材又性感。紙係包唔住火嘅，呢啲「外表斯文內裡Open」嘅男神，就算包到實一實，每個小動作都令人慾火焚身，你話點頂。
近年青靚白淨小鮮肉性大行其道，不過一班冷淡風格成熟男神散發出嚟嘅男人味，由少女到師奶都一樣淪陷，真係擋都擋唔住！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
image source:Twitter/tvN
第十名：趙寅成
韓國「公共財產」、身高188嘅趙寅成可以話係長腿oppa最早期嘅代表人物。電力強勁嘅眼神同性感低沉嘅聲音，身高、顏值、長腿、演技，觀眾緣佢都有齊曬。被形容為直男嘅佢，以前拍過有唔少親密鏡頭，但被問起有咩感受都表示「無感覺」。一拍完戲就抽離，夠曬專業，咁cool嘅性格反而令fans更想去征服佢！曾經幫酒店app拍廣告，一邊解領帶一邊邀請大家一齊去酒店休息。咁嘅誘惑，大家頂唔頂得住先？
image source:Instagram/zoinsung_cn
第九名：金材昱
被譽為好似雕塑一樣咁完美嘅oppa，唔單止識彈吉他、鋼琴，大學時期玩樂團已經好受歡迎，仲寫過唔少歌。近排成為熱話嘅《她的私生活》，永遠一號表情，眼神散發性感氣息，網友睇到面紅心跳，將佢封為「金材慾」，每個小動作都散發緊男性荷爾蒙，唔少人話明明只係簡單嘅動作，由佢做出嚟，比床戲更加刺激，睇到人腳都軟埋。
依家劇情發展如火如荼，呢到就唔劇透喇，仲未睇過嘅記得快啲開始追，千祈唔好錯過！
image source:Instagram/jaeuck.kim
第八名：金秀賢
《來自星星的你》入面飾演外星人嘅金秀賢，無論少女到師奶都通殺。
有超能力嘅都敏俊，因為生活咗400年，醫學法律等等咩範疇都精通， 無法挑剔嘅角色設定，簡直係全世界女性心中嘅完美情人。唔洗多講，大家都知道金秀賢一樣擁有一身結實肌肉，俗語話「世上沒有醜女人，只有懶女人」，其實做男明星一樣唔簡單，要努力保持身材。面無表情，令人好似捉摸唔到咁樣，反而令女人更有好奇心，佢嘅「另一面」到底係點！
image source:Instagram/soohyun_k216
第七名：張東健
「歲月不饒人」係一班大叔男神身上似乎唔係好適用，講到越老越有魅力嘅演員一定要提嘅就係張東健。花美男型嘅佢，後生時憑劇集紅遍亞洲，擁有fit到爆嘅身材。《Suits 金裝律師》入面著住西裝，斯文打扮同佢本身粗曠外表一正一負，幾密實嘅西裝都包唔住骨子裏嘅性感！有人話男人就好似紅酒一樣，越老越有味道，隨住年紀越嚟越大，張東健更加有男人味，但咁都唔會阻到大家對佢有無窮幻想呀！
image source:Instagram/jangdonggun_fan
第六名：李民基
李民基曾經係model，轉型做演員之後，演技好就出曬名。當年《花美男樂隊》一出場，就引起好高討論度，大家都以為佢係男主角，可惜第二集開始就已經無戲份。雖然唔係典型靚仔樣，不過憑佢可愛性格同霸氣眼神，即使後來當兵曾經被不實負面新聞影響，回歸螢幕之後一樣好評如潮。所以話呢，性感真係唔一定係露肌肉，有時一個眼神就足以令人女性神魂顛倒。
image source:Instagram/xgo_odx
第五名：李棟旭
李棟旭唔止係孔劉好朋友，仲同樣有份出演《鬼怪》，雖然係男二，但人氣都一樣好高！外表望落高冷，但其實溫柔可愛嘅性格，又係一個反差萌嘅成功例子。身高184，白白淨淨嘅外表，曾經係電視劇入面嘅出浴鏡頭展露恰到好處嘅完美身材，工作態度好，私下感情生活都好專一。幻想下：高冷男神私底下淨係對你一個好，扮可愛氹你開心，真係諗下都興奮～到底點解男神個個都咁完美？
image source:Instagram/leedongwook_official
第四名：蘇志燮
由運動健將變身為專業演員，蘇志燮運動員身材著起西裝，若隱若現肌肉線條，令佢被封為「全世界著西裝最有型」男明星。望落勁大男人嘅佢擁有招牌單眼皮、cool到爆又憂鬱嘅表情，已經成為大叔級嘅佢仍然好有魅力，大部份女性都應該會被佢每分每秒散發嘅雄性氣息吸引。除咗演戲，仲踩過界玩音樂、唱rap，名副其實全能藝人，樣樣都識，你玩曬啦。
image source:Instagram/51k_official
第三名：孔劉
2016年係世界各地都得到好多好評嘅電影《屍速列車》，仲有之後討論度好高嘅《鬼怪》，兩套電影男主角都係由孔劉飾演，係一韓國咁多oppa中雖然唔係最靚仔，但出色演技一樣吸引唔少忠實觀眾。出咗名係暖男嘅佢，身材都唔可以睇小㗎！
被譽為「韓國身材最好演員」，仲拎埋「最性感身材韓星」冠軍，性格好、有實力、有身材，無得輸喇掛。
image source:Instagram/gongyoo7010
第二名：玄彬
演過多齣經典電視劇嘅玄彬，咁多年嚟冧到咁多女fans絕對唔係幸運咁簡單，招牌酒粒加埋迷人笑容夠曬殺食，演起戲上嚟認真嘅樣又懾服唔少人女Fans。好多明星當完兵出嚟人氣都會「不復當年勇」，玄彬自願以海軍陸戰隊入伍，體能測驗同考試，都以相當優良的成績通過，隔咗四年回歸電視熒幕，作品一樣大受歡迎。我地一齊期待下男神嘅下一步作品啦～
image source:Instagram/withhyunbin
第一名：朴敘俊
係韓劇《金秘書為何那樣》中，演繹到好似網路漫畫人物李英俊本人咁嘅朴敘俊，演技備受讚賞之餘，仲迷倒唔少女性。霸道總裁配秘書呢個設定雖然老套，但呢套戲再一次證明果然「橋唔怕舊」！劇入面木口木面加自戀性格，唔少對白都令人起曬雞皮，但表達感情方法直接到令一班女觀眾睇到個心撲撲跳，覺得呢種反差好cute，女人心真係好難捉摸呀。
image source:Instagram/bn_sj2013
分析說明：
本研究資料分析時間範圍為2018年05月06日至2019年05月07日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『禁慾系男神 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
