現任阿仙奴「10號仔」史密夫路維已經缺陣多時，啱啱完成咗9月以嚟嘅第一場波：喺英格蘭U-21為國上陣。要睇佢再次披上兵工廠波衫，唔知仲要等到幾時？
開季以嚟，史密夫路維嘅腹股溝肌腱一直有隱疾，喺9月決定開刀治理。當時預定12月可以全面復操，但到今年3月先至完全消除痛楚，達到可以上陣比賽嘅程度。身體搞返掂，之後要調整嘅就係作戰狀態。
呢位22歲嘅攻中，同薩卡一齊被阿迪達提攜做主力，被視為阿仙奴中興的希望，甚至賦予極具意義嘅10號波衫。上手阿仙奴10號仔，已經要數到雲加時代嘅中前場核心奧斯爾。但球隊最後決定購買已經成熟嘅「挪威神童」奧迪加特，令史密夫路維長坐板凳。
當然，阿迪達唔係未試過比奧迪加特同史密夫路維一齊上陣，奧迪加特中間派牌，史密夫路維作為左邊嘅第二個持球點，喺佈陣上係可行嘅，佢兩個亦合力炮製過2個入球。但咁嘅做法需要衝擊力更強嘅左閘去配合，球隊上季買咗仙真高作為戰術棋子，喺防線左邊同中場之間遊走分波，另一位左閘泰亞尼就係比較平均嘅類型，傳球視野唔錯，但唔算係衝擊力強，難以善用史密夫路維移向中路之後，左路空出嚟嘅空間。
奧迪加特球場覆蓋面稍大，回撤攞波頻率較高，而且反應同判讀速度都較快，令佢可以做多啲one-two pass，配上薩卡嘅突破力，能夠快速衝擊對手防線。相較起嚟，史密夫路維位置比較接近球門，喺攻中、挨左少少嘅內切翼鋒都能勝任，踢法上會持球吸引對手防線注意力，等待隊友後上接應，甚至自己左右開弓射門。
有奧迪加特穩佔中路一席位，加上馬天尼利喺左翼進步飛快，同箭頭新援捷西斯合作無間，為咗兼顧陣容嘅平衡，季初唯有將史密夫路維放入後備。
目前《TransferMarkt》尚有約£35M身價，以一名長期受傷，且在隊內爭唔贏位置嘅球員來說算高，反映出佢天賦尚在，只差展現嘅機會。史密夫路維要返到去呢個Level，相信需要時間去回復狀態。國際賽期前8場波，史密夫路維都被列為後備席，到而家被國家隊U-21徵召，得以上陣。
「我嘅目標依然係回歸阿仙奴陣容，好想快啲上陣，球隊呢段時間做得好好，我想成為佢哋嘅一份子。」而相隔半年後復出，阿仙奴喺冇史密夫路維嘅情況下衝上英超榜首，今季要衝擊聯賽冠軍，睇怕阿迪達今季都唔會輕易改變佈陣，令史密夫路維嘅上陣時間喺季尾少之又少。
希望史密夫路維用今季剩餘時間好好養傷，用僅餘不多嘅後備上陣時間調整狀態，下季重新開始。