陳柏宇街頭直播被認錯為洪卓立　女兒面前表現尷尬：只係調轉咗個名

41歲陳柏宇(Jason)出道18年，又攞過叱咤樂壇「我最喜愛的男歌手」，又有多首膾炙人口歌曲。早前Jason和女兒去食早餐途中就遇到街坊被邀合照，但對方竟然認錯Jason係洪卓立。

當日陳柏宇帶兩個女兒陳羿辰(Abigail)和陳星晴(Audrey)去食早餐，直播途中就遇到街坊上前問：「你係咪洪卓立？」陳柏宇急否認：「我唔係洪卓立呀！」但街坊繼續要求合照︰「我可唔可以同你影張相？」陳柏宇提醒對方自己並非洪卓立，合照之後Jason更搞笑鼓勵街坊記起自己名字：「加油，你得㗎！」最後該街坊終於記起。
之後陳柏宇就向大女解釋：「我都係第一次被人認錯係洪卓立。洪卓立係另一個同爸爸同一時間出嚟做歌手嘅叔叔……其實佢係認得爸爸，只係調轉咗個名。」

事件發生後，有網民在社交平台相認：「今朝我老公買早餐撞到你，噚晚去咗飲太盡興，佢酒未醒，佢話佢第一次見到明星太緊張，叫咗你做洪卓立。」更指自己是Jason粉絲：「佢返嚟我已經狠狠地訓話咗佢，我話：我偶像你都敢叫錯，你即刻同我7街瞓！」