《美麗戰場》結局遭鬧爆爛尾 觀眾嬲爆開「葉伯母」群組聲討

無綫台慶劇《美麗戰場》昨晚（28日）播出大結局，劇集最初頗受好評，進入結局周卻頻頻出事，最後一集更遭網民鬧爆，不滿劇情虎頭蛇尾。大結局劇情講述戲中陳瀅引導丁子朗殺死陳曉華，被劉佩玥踢爆事件，兩姊妹再度決裂；另外，林盛斌則疑似設局令方力申見到朱晨麗與爸爸的秘密關係；之後陳瀅又莫名收到神秘來電，孭住涉嫌殺人罪離港的「阿妹」蔣家旻突然靚靚現身，並挑機地說了句：「家姐，咁急趕住去邊呀？」。

劇情最初以描寫陳瀅成魔之路為主線，可惜最終未能好好解釋多條伏線，種種瑣碎又毫無邏輯的劇情引發觀眾不滿，甚至有網民在社交網站開設公開群組「葉念琛美麗戰場結局 導致葉伯母被瘋狂問候關注組」，齊齊插劇情。

對於觀眾不滿開放式結局，導演葉念琛透露成班演員昨晚一齊睇結局，大家都好想拍續集，又稱其實以前好多經典劇都係開放式結局：「唔少大家到依家都仲會念念不忘。我覺得追劇最開心，係追得過癮之餘，仲有種對結局好上心嘅感覺，一睇完就好想同人分享，鍾意又好、唔鍾意都好，總之引起到討論嘅氛圍，就係我想大家有嘅感覺。今晚都好多人去我個 Page 度留言，想搵我出嚟講清楚。」似乎對負評早已練就金剛不壞之身。

至於網民指結局中方力申生死未卜、朱晨麗未知與誰講電話、蔣家旻為何突然現身等橋段明顯未完待續，拍得唔清唔楚疑似為鋪路拍續集，他則神神秘秘指：「如果真係開拍續集，一定會有答案。」