早排班老外高爾夫波友在whatsApp群組通報：「 Another loss after 24 years！ 」講嘅係位於馬鞍山西沙路的「園藝高爾夫中心」，呢個平民化嘅高球練習場屬於新鴻基地產旗下的，以前見過DJ區瑞强常來練波。
記得新地二少郭炳江幾年前由赤柱出册、重獲自由，第一時間就到此練習場，揮番兩棍兼順道巡地盤。附近就是新地十四鄉大型住宅項目地盤，由收地到發展經歷起碼二、三十年，郭炳江視之為佢嘅 baby，如此浩瀚工程現時由阿囝Adam郭基煇接棒。
廣告（請繼續閱讀本文）
開業24年的園藝高爾夫中心暫別波友，指發展商將練習場重建。
幾年前，有幸以傳媒身份跟Adam飯聚，他已斬釘截鐵話不會摺埋「園藝高爾夫練習場」嚟起樓。
廣告（請繼續閱讀本文）
又係嘅，有橋你抄都冇咁笨摺埋佢啦。沿西沙路揸多20分鐘車，就是新世界旗下嘅「香港哥爾夫球及網球學院」，Adrian鄭志剛搞此私人高級會所，可謂香港地產界先驅，疫情之下冇得出門都要揾地方透下氣，Private Club會籍難求亦升值不少。
「園藝高爾夫中心」早前曾翻新，波友以為防疫限制放寬有好去處，但4月份才得悉關門大吉。
廣告（請繼續閱讀本文）
新地一於利用高爾夫為豪宅升呢。今年3月已向城規會提交方案， 將「園藝高爾夫球中心」地皮改建為體育康樂設施。儼如一個英式莊園，到時有個高級高爾夫球俱樂部作配套，個樓盤又點可以平賣呢？不過公眾人士就未必有機會享用喇。
有時做生意飲頭啖湯固然威水，識得快手偷師，再將條橋發揚光大，咁就Hole-in-One啦！
密切留意BossMind動向！立即CLS