呂爵安開騷前化身精靈出新歌　拉《膠戰》好友一齊拍MV減壓

呂爵安（Edan）個人演唱會本周五舉行在即，現正忙於排練的Edan早前抽空製作了兩首全新歌曲，並先後在今明兩日推出。打頭陣有的〈Again!〉就找來《膠戰》好友岑珈其、徐浩昌（肥腸）及黃正宜（阿正）一同拍攝MV，實行演唱會未開，先送上驚喜與笑彈！

Edan這次新歌〈Again!〉由Edwin作曲，周耀輝填詞，Edward Chan監製，Edan很希望借助新歌能感染大家，傳達正面的思想。「做人開心唔係咁簡單，但呢個世界好多人都陪住你，好多嘢可以重新嚟過，一齊去努力令到件事變得更加好，所以想用呢首歌帶啲正能量鼓勵大家，話俾大家知，好多人陪住你哋㗎！」

歌曲雖然看似沉重又帶點深奧，但MV卻是截然不同的風格，更突出了Edan的搞笑形象！「MV想用一種輕鬆少少嘅方式表達，所以同導演講不如玩啲搞笑啲嘅嘢啦，因為一直以嚟嘅MV，都冇乜邊隻MV可以好搞笑好瘋狂，所以今次度咗呢個MV故仔，我好鍾意！」

要拍出瘋狂搞笑Mode，除了6膠，應該都沒有更合適的演員加盟，Edan說：「一諗就好啱《膠戰》嘅朋友，特別啱肥腸、珈其同阿正，Hilary同Jeffrey就唔係好啱嘅角色，所以我同佢哋講，唔好意思，你哋太靚，下次先！」Edan坦言能有《膠戰》的隊友一同演出特別開心，他說：「因為拍《膠戰》以外， 都冇乜機會同佢哋合作，可以搵佢哋一齊玩，所以好正！同埋咁啱今次準備緊演唱會，我可以掉晒俾佢哋做下，我對佢哋嘅演出都好有信心，咁我就輕鬆啲，令到今次係我拍攝時間最短嘅一次嘅MV。」

既然要拍攝一個瘋狂嘅MV故事，造型上當然不能隨便，結果珈其、阿正及肥腸的造型都為大家帶來驚喜，Edan表示這要歸功於一眾幕後人員。「我哋花咗好多心思喺佢哋嘅造型，特別係一諗起阿正做奸角，就覺得要俾粒癦佢，結果成個造型都好襯佢，係Perfect Match，其實佢間唔中出show都可以試下咁做，好啱佢Punk Rock嘅形象。肥腸直情突顯佢嘅優點出嚟，好吸睛，一定會望住佢。珈其整埋個頭，好啱佢MK年代，將佢哋3個嘅優點放大，所以我相信佢哋 都好滿意!」

好友們都有突出造型，Edan當然也不能例外，這次他扮演精靈，早前他在社交平台 Share時已引起廣泛討論，他自己都感激幕後製作團隊為他精心設計造型，Edan說：「我個角色係一個精靈，守護個女仔，所以就有精靈Look嘅諗法，呢個妝同呢個造型用咗兩個幾鐘，黐上去嘅假耳仔都整咗6個鐘，成件事好有心思，仲有其他瘋狂玩嘢造型，雖然拍攝鐘數唔算好長，喺MV出現時間亦唔算好長，但都好多得意嘢發生！」