不可能任務｜黎諾懿一改親切形象嚴肅訓話 賴慰玲做導演緊張失眠壓力爆煲

TVB綜藝節目《不可能任務》系列，第二季首個任務為「電視幕後製作挑戰」，升呢監製的黎諾懿，帶領「導演」賴慰玲、三名「資料撰稿」戴祖儀、李芷晴、梁超怡、三名「助理編導（PA）」關楓馨（Fabi）、程浩駿、周百恩齊齊轉戰幕後，挑戰於55天內「由零開始」完成大型直播慈善騷！

上集結尾遭照肺的黎監製，因有感團隊「太過天馬行空」，立定決心要重整旗鼓，以親切見稱的諾㦤更難得嚴肅Tone向團隊訓話：「我哋時間有限，唔可以次次咁樣模稜兩可開會，真係想大家切切實實搞啲嘢。」監製發威，眾人面瞪口呆兼輪流懺悔，戴祖儀更化身「訓導主任」助攻望監製息怒：「大家唔好成日喺屋企煲劇，淨係識得食！」為了「急起直追」，撰稿及編審團隊即時入讀製作組安排的「雞精班」惡補基本功，賴導演則與黎監製構思舞台設計。經過一輪努力，黎監製團隊出乎意料獲得好評，提案順利獲得通過。

克服首項難關後，團隊在攝製過程中依然困難重重，首個外景日，身為導演的賴慰玲化身「拆彈專家」瘋狂化解危機。首先擔任PA的Fabi，雖然全程任勞任怨，更是最早現身準備的一位，可惜因為「零經驗」，竟於抵達拍攝現場時才驚覺自己帶漏很重要的東西，令團隊陷入「停拍」危機。之後團隊於街頭取景時，又遇上場地負責人驅趕、需臨急臨忙另覓拍攝場地。

忙於拆彈的阿賴，事後坦言外景出發前一晚緊張至失眠、壓力爆煲：「之前嗰晚我瞓唔到，不停發開口夢，呢個擺左邊好唔好呀‥‥‥」

外景拍攝嘉賓張馳豪及薛家燕，則對團隊表現有兩極評價，張馳豪笑言：「佢哋同我哋溝通時有少少驚青。」家燕姐則對賴導及黎監製讚口不絕：「我覺得好特別，今日我一見到黎諾懿，我以為佢同我一齊做嘉賓，點知佢話做監製，佢真係做足監製嗰個款喎。」語畢更哈哈大笑。