卡塔爾世界盃日記 Day1
萬眾期待揭幕戰開波
話說前日提到我哋接受咗CNN訪問，今日發現篇報道真係出咗街喎，以下網址可以睇到：
https://edition.cnn.com/2022/11/18/football/qatar-fan-village-accommodation-intl-spt/index.html
世界盃今日正式開鑼，焦點當然係萬眾矚目嘅揭幕戰，但場波晚上先開打，日頭當然要搵埞去。我哋乘搭Metro金色線去到尾站Al Aziziyah，車站旁邊就係多哈最大商場Villaggio。呢個商場好明顯係參照拉斯維加斯同澳門嘅威尼斯人酒店興建，之不過冇賭場，係清水版。商場內部有人工河道環繞，遊客可以坐上貢多拉船遊船河，河道兩旁就係一間間「矮屋」商店，仰望可見「藍天白雲」，當然唔少得「露天」茶座。
第一件事去醫肚，揀咗一間裝修好別緻嘅餐廳，叫做Eau De Rose。餐廳採用玻璃穹頂設計，陽光從天上透落嚟，感覺非常舒服，而座位就好似一個個種滿花草嘅鳥籠，別具特色。
坐低之後，仲未點餐，侍應就攞住一個銅壺走過嚟，原來先搞氣氛。佢將水倒落乾冰度，霎時間成張枱仙氣瀰漫，好似走入咗童話世界。
餐牌上不乏噱頭菜式同飲品，比如三色藥水，其實係三種味道嘅汽水，都比較甜。我哋又點咗一客炸蝦杯，非常美味。（Day14仲有Villaggio飲食推介）
商場非常之大，除咗名店、咖啡廳，仲有超大嘅超級市場，同埋兒童歡樂天地，裡面甚至有摩天輪，而商場通道又有小火車行走（清邁嘅Central Festival都有，而且更多車卡），小朋友絕對可以樂上大半天。
行Villaggio行到黃昏時分，係時候返球迷村，準備同大班球迷一齊睇揭幕戰直播，當然要開定薯片。
3、2、1，開波！由於球迷村接近機場，喺呢度睇波嘅最大特色係，每十分八分鐘就會有飛機低空飛過，都係非常獨特嘅體驗。場波最終由厄瓜多爾勝出，當厄軍入波之際，現場都有少數厄瓜多爾人揮舞毛巾歡呼，我哋都深深感受到呢份旗開得勝嘅興奮心情。
是日賽果：
卡塔爾 0:2 厄瓜多爾
by港佬