罷睇TVB／到底有幾多人支持大台？十部香港人力撐好睇嘅劇集

網民罷睇，成效如何？

根據《KEYPO大數據關鍵引擎》網路大數據圖表可見，香港網路就「罷睇TVB」討論嘅聲量，喺2019年6月18日達至最高點，之後陸續都有討論，未見平息，可見網路上的確有針對罷睇TVB嘅討論。不過，咁並唔代表香港網民唔睇唔傾，睇睇下面十套網民熱愛嘅劇集就知喇！

罷睇？照睇！

香港地，愈嚟愈多人唔睇電視，睇手機睇電腦仲開心。近呢一年，香港社會情況變化好大，網路出現咗另一種聲音，就係唔少網民話要罷睇大台 TVB。只不過，講還講，要真做到又係另一件事！TVB 做咗大台咁耐，真係可以話一台獨大，陪伴幾代香港人成長，唔係一句慣性收視就講晒嘅。百年老字號，出產嘅劇集，一向好多香港人讚好力撐。今日就等DailyView用網路大數據話你知，罷睇至今，香港人仍然話好睇嘅十部劇集喇！

DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。

十套罷睇仍然不倒嘅TVB劇

10 她她她的少女時代（1824筆）

2019年香港國際影視展10部推介劇集之一，TVB 播出嘅《她她她的少女時代》，呢套劇一播出就引起觀眾喺香港討論區熱烈咁討論，仲話第一集真係好正，節奏幾快㖭！故事講一位離婚中女，點樣喺失婚失業，女兒離家嘅危機之中，重拾人生動力，面對難關。佢重遇當年迷戀嘅偶像，而呢位偶像都同佢一樣潦倒不堪，老公唔拖唔水，佢一樣要重新振作。佢嘅㣔動激勵咗身邊好多人人。一群失意嘅中年男女，再次出發，證明咗人生一樣有第二次，一樣可以精彩。

網民：「睇完我都有動力生活。」

9 鐵探（1864筆）

TVB喺2019年播出《鐵探》，大受好評，演員出色，劇本對白又多名句。鐵探警匪題材一向係TVB嘅強項之一，除咗演員精湛演技，劇中寫實嘅劇情令唔少網民都有感而發，喺劇情搶先討論區得到好高嘅討論度。故事講袁偉豪演警探尚垶，開始無耐已經講佢中槍受傷，要為自己尋求公道，之後仲捲入咗一場忠奸難分，現實版職場勾心鬥角，爭權奪利嘅Office Story。哇，唔怪得《鐵探》咁受香港人關注嘅，因為我哋成日都會面對到呢種情況，面對現實人生好多嘅不公不義。

網民：「單單係姜皓文已經好值得睇！」

8 婚姻合伙人（1887筆）

買唔買得起樓，已經成為咗香港人階級嘅分野，有樓有女有高潮。貼地題材加上抵死對白令大家對呢套劇特別有共鳴，高Ling喺最後結局篇入面對住鏡嘅一段內心戲，就得到唔少網友嘅討論同讚賞，話佢將角色嘅情緒演繹得好出色。TVB《婚姻合伙人》就用香港地產做題材，講男女主角合作經營劏房，仲成功到開設埋地產代理公司，大賺特賺。不過，做人邊有咁輕鬆！隨住劇情推展，唔止有三角戀，仲有家庭糾紛。多矛盾，先有戲做先好睇。

網民：「有樓煩，都好過無樓煩。」

7 多功能老婆（1901筆）

香港地，做女人真係唔簡單，唔好以為嫁咗出去就一身輕鬆，好似TVB 《多功能老婆》一樣，做老婆一樣要好多功能。大部分人都鍾意有情人終成眷屬嘅大團圓結局，而令呢套劇討論度飆高嘅就多得劇中Jonathan突然離奇死亡，網民表示真係諗極都唔明點解死。到底香港有冇真愛？成日都見到男人出去溝女包二奶，玩到唔識返屋企，做女人嘅唔通只係留喺屋企等人咩？香港最多事業女性，老公偷食，自己都有好多嘢可以做。好似《多功能老婆》咁，女主角老公出軌，之後遇到個好男人，但老公又返嚟，三角戀大戰！

網民：「唉，愛情真係難！」

6 牛下女高音（2396筆）

TVB早喺2018年，其實早就拍完《牛下女高音》，只不過喺呢段期間，爆發咗香港娛樂圈相當知名嘅醜聞「安心事件」。而呢部劇嘅第二女主角正係黃心穎，佢喺劇入面有大量戲份，為咗觀眾唔會出現負面反應，暫時唔播住。雖然因為意外押後咗播出，不過睇嚟並無冷卻大家熱情嘅關注，套劇播出第一集，就已經引起網上最高嘅討論熱度。

Well，呢部劇咁多人留意，唔多唔少都同呢件事有關。香港人係善忘嘅，一於安心睇劇，忘記負面事件。

網民：「其實套劇都幾好睇喎。」

5 包青天再起風雲（4010筆）

包青天呢三個字，一向都係香港劇集、電影嘅收視保證。TVB 喺2019年播出嘅《包青天再起風雲》，包青天呢D古裝經典，首播之前都會令大家好好奇同過去舊版有咩分別，又可唔可以超越過往舊作？所以呢套劇播出頭一、二集就已經造成大家熱烈討論～

包青天嘅經典情節，好似狸貓換太子、樓蘭傳說等，呢類經典故仔緊係有。新嘅好似夜半鬼敲盤、逆天奇案一樣精彩，滿足晒香港人。

網民：「香港都要有一個包青天。」

4 十二傳說（4614筆）

《十二傳說》，係TVB Amazing Summer推介劇集之一。但因為結局並無詳細交代後續，留低一個懸念俾大家，開放式結局引起大家好多討論，成為全劇討論熱度最高點。呢部劇係講香港本地嘅都市傳說，由蕭正楠做記者擔正男主角，同由林夏薇演嘅民族學教授一齊，要完成一篇關於香港都市傳說嘅論文，喺調查期間出現咗好多故事，神秘得引人入勝，而且又同香港本地都市傳說關係緊密，難怪咁多人都睇得咁投入嘅。

網民：「睇完我個心都驚驚！」

3 白色強人（7804筆）

TVB向來有拍開醫院劇嘅傳統，好似早年《仁心仁術》就係經典。2019年推出嘅《白色強人》，一向好受歡迎，故事圍繞醫生救急扶危情況發展故事，亦都有探討醫療改革嘅問題，可謂有淺有深。喺7月11日白色強人神曲中文版首播同埋結局當日網路熱度飆到最高點。呢部劇，仲出咗「視帝」、「視后」。馬國明、唐詩詠以呢部劇奪得「最佳TVB男藝人」同「最佳TVB女藝人」殊榮外，亦成為咗新加坡嘅「視帝」、「視后」！

網民：「馬明真心男神，必撐。」

2 金宵大廈（12645筆）

呢套劇討論嘅高峰就喺結局嗰日張彥博有喺FB PO咗一篇感謝觀眾嘅貼文，而留言入面仲有好多網民讚佢第一次擔正就做得咁好，希望TVB之後俾多d劇同主題曲佢擔正！早排DaiyView先分析過，《金宵大廈》係全港網民傾得最多嘅穿越劇！呢部穿越劇取材獨特，內容用前世今生做主線，涉及夢、寓言、曼德拉效應、蝴蝶效應同平行時空等議題，真係相當有深度。最重要係食正香港本土嘅熱潮，以尖沙咀嘅香檳大廈做主要故事背景，緊係令好多香港人受落喇。TVB見咁受歡迎，食住上話拍續集！

網民：「TVB又拍得幾好睇喎！」

1 愛．回家之開心速遞（25655筆）

香港長篇處境劇，一向深受香港人歡迎，由《歡樂今宵》到「愛回家系列」，真係陪住好多香港人成長，可以話係屬於香港人嘅集體回憶呀！雖然依家好多網民都話要罷睇呢套長壽劇，但其實網路熱度一直都居高不下，連LIHKG都一直仲有開劇情討論嘅POST㖭，而且好多網民都話「平時都唔想咁快到星期一，但係今個星期就特別想快啲到星期一，因為有龔水！」。劇集故事圍繞「熊氏一家」嘅生活，亦都反映咗香港時事、熱門話題等，充滿正能量，有時仲會抽吓水，幫香港人輕鬆吓。

網民：「日日放工都要睇愛回家！」

【香港網路溫度計調查結果之圖文，未經授權請勿轉載、改寫】

分析說明：

本研究資料由《KEYPO大數據關鍵引擎》提供，分析時間範圍為2019年03月13日至2020年03月15日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『十大香港TVB熱門好睇劇集』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。