英國哈里王子Prince Harry同梅根Meghan Markle嘅愛情故事一直都備受關注，由佢哋被影到約會，到訂婚、行禮，都成為全球嘅矚目盛事。而向來都被稱為王室壞孩子嘅哈里王子，身邊女伴不停轉，但最後就被梅根收服，一齊步進教堂，到底梅根係點做到嘅呢？
比哈里王子年長3年嘅梅根今年36歲，生於美國洛杉磯，6歲時父母離異。但佢自小就入讀好學校，仲畢業於私立學府西北大學（Northwestern University），係一位高材生嚟架，結婚前就係一位演員。
- 堅強又獨立
梅根係一位演員，但作品唔多，喺演藝圈亦唔係非常有名氣，開初當演員時，就因為佢嘅種族同膚色都處於灰色地帶，所以幾乎搵唔到適合嘅角色，直到後來美劇《金裝律師》（Suits）嘅導演認同佢，讓佢演出一個女角，就成為咗佢嘅代表作。
一路以嚟嘅事業發展都唔順利，但就因為佢堅毅不屈嘅個性，令佢更加硬朗，那份自信完全迷倒哈里。
梅根嘅經歷令佢更加成熟，亦識得點去照顧朋友、長輩，讓哈里王子都好放心。
- 個性開朗活潑
問到哈里王子係幾時愛上梅根嘅，佢就甜絲絲地笑答：「初次見面時已經鍾意咗佢」。當時梅根喺加拿大拍攝《金裝律師》，而咁岩哈里王子就去咗加拿大出席「不可征服運動會」閉幕禮，二人喺當時經朋友介紹下認識，一見面就一見如故，傾得好開心，梅根言談時表現得自然開朗，笑容甜美，就係咁電暈咗哈里王子。
3. 敢言又具知性美
梅根一向都好敢言，不時都為女權話題發聲，佢就曾經講過：「女生有自己嘅聲音」，男生都喜愛獨立又有思想嘅女生，魅力更加大。向來都唔喜歡規矩嘅哈里王子，遇到呢位咁有個性嘅梅根，唔會盲目跟從傳統同規矩，同哈里王子咁合拍，難怪令哈里王子愛佢愛到不能自拔。
4. 心地善良
心地好唔好，真係無得呃，相處得耐咗，就能夠從佢嘅行為舉止，睇得出呢個人係唔係好人。梅根從小就飽受各種眼光、面臨自我認同等問題，所以佢好希望可以幫助到弱小社群，一直都致力於慈善活動上，又會同哈里王子一齊去做義工，大家都咁有愛心，所以哈里王子對佢一見傾心。
望見哈里王子同梅根每次對望，眼中都只有對方，同埋充滿住粉紅泡泡，就知道佢哋係幾咁夾同埋愛對方，能夠相遇到相愛，真係要好好珍惜對方！