講起「減肥」，自然就會諗起戒食甜食，例如雪糕、朱古力、糖果等等，但其實食朱古力好處唔少，不過要揀一啲較為健康嘅朱古力，當中嘅好處甚至係可以有助減肥添！
減肥始終係長期戰爭，要長時間唔接觸甜食真係好困難，其實食朱古力對身心都有好處㗎！以下為大家介紹食朱古力嘅8大好處，以及減肥時食朱古力嘅小貼士，令大家即使減肥，都可以無憂無慮咁食朱古力啦！
朱古力4大好處：
1. 抗衰老、抗氧化
朱古力可以抑制LDL膽固醇氧化同血小板活化，同時可以抵禦UV紫外線，有抗氧化作用，連臉上嘅皺紋都會少啲添！
2. 降低膽固醇、控制糖尿病
朱古力入面含黃烷醇，係一種有助抗氧化嘅成份，除此之外仲可以幫助身體降低膽固醇以及控制糖尿病。
另外，仲可以幫助身體清除自由基，防止DNA損傷之餘，仲可以保護血管預防堵塞，減低心臟病、高血壓同中風出現嘅風險。
3. 心情變好、紓壓
食朱古力會令人開心當然人人都知啦！原因係朱古力可以刺激大腦，增加更多快樂荷爾蒙及安多酚，仲可以抑制憂鬱情緒同紓緩壓力添啊！
4. 專注力提升
黃烷醇更有助促進血液循環，而大腦當中嘅血流增加，可以提升大腦活動能力，令頭腦更加敏銳，增加記憶力及集中力。
減肥人士貼士：
減肥時當然少吃為妙，但如果真係對甜食忍唔到口，都可以食黑朱古力補救！
英國有調查發現，有86%受訪者喺減肥期間照樣食朱古力，結果都能夠成功減磅，當中仲有91%受訪者喺減肥期間所食用嘅朱古力份量，同減肥前係一樣添！
1. 飯前20分鐘食黑朱古力
由於黑朱古力當中含有一種可減低刺激食慾嘅「飢餓素」分泌，有飽肚作用，所以喺飯前20分鐘食黑朱古力，有助降低食慾，有研究指仲可以大大降低五成食慾！
2. 盡量選擇糖份較低嘅黑朱古力
脂肪嘅增長主要來自糖份，而黑朱古力由於含高百分比嘅可可，糖含量相對較少，因此減肥時絕對可以食黑朱古力！
但市面上純黑朱古力嘅選擇較少，而且唔係人人都中意嗰種苦澀味，大家可以選擇糖份較低嘅黑朱古力，咁就無純黑朱古力咁難入口啦！
3. 選擇只含可可脂嘅朱古力
朱古力含有油份當然無可避免，而植物油中有大量飽和脂肪，可可脂相對比較健康，因此要盡量避免含植物油嘅朱古力，以免越食越肥！
4. 淺嚐為妙勿多吃
唔止係朱古力，所有食物吃多都無益，而且朱古力始終都係高熱量食物，當然淺嚐為妙啦！每日飽和脂肪攝取嘅能量應少於總攝取量10%，男性而言則應攝取少於約25g飽和脂肪，而女性應攝取少於約20g飽和脂肪。
雖然唔係所有朱古力都有減肥功效，減肥時都係只可食黑朱古力為主，例如牛奶朱古力等高脂高熱量嘅朱古力，當然少吃會較好！但減肥始終唔係一朝一夕嘅事，偶爾選擇食較為健康嘅朱古力，獎勵下自己都無妨！
圖片來源：Shutterstock
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）