張兆輝（輝哥）一對子女張焯鏗（Edison）和張卓姿（Twiggy）早前因疫情關係回港避炎，由於要返英國為開學作準備，昨晚10點半，「24孝老竇」輝哥便陪仔女到機場，又為Twiggy推行李到商務機櫃位check in；輪候期間，錫到個女燶的輝哥還不時輕拍囡囡個頭，之後行到離境閘口前，他又跟子女擁抱及拍照留念，盡顯不捨之情。Edison率先以容貌識別機自助進入禁區，隨後的Twiggy因未能識別，於是改去有工作人員的櫃位排隊，此時見輝哥表現緊張，最後見愛女順利入閘與兒子會合才鬆一口氣。
問到是否很不捨得子女？輝哥隨即眼紅紅說：「都要返去啦！」並透露兒子於9月中開學，要預早少少返英安排學校宿舍，女兒則九月初開學，首先會在學校隔離14日同溫習。輝哥指，臨上機也有叮囑子女要小心，好似返港時穿着保護衣、手套、面罩等，又笑言子女喜歡坐長途機，因為可以睇戲、玩電腦又得，亦適應到時差問題。問可有為子女準備防疫用品？他說：「帶了幾個月用量的口罩，再帶多咗少少，睇吓同學有冇需要！我相信女兒需要量不大，因為她成日留在宿舍內，一個口罩用一、兩次都得！出去戶外就會勤力換，而家大個識照顧自己，仲買咗維他命畀他們吃。」預料女兒會於聖誕節返港，兒子則未必回來，希望當地疫情不會再嚴重，亦呼籲大家要自律戴口罩。那麼一對寶貝仔女返英，自己如何平衡心情？輝哥說：「聽日（即今日）返工啦！心情好空虛，屋企隻狗一見他們走都sad，小狗好醒㗎！見他們打開行李就好靜坐喺度，我應該2個星期平復心情，同埋唔好靜！今日（即昨日）經過條路，我諗起跟女兒黃昏時行想起的回憶。不過他們返英後，就會減少互動，一星期兩、三次囉！（聖誕節放假陪女兒？）未必在香港，要去工作，希望到時疫情完，如果仲要14日隔離這段時間未必在港，而家唔怕，有視像可以止下咳，好過無。」
對於太太未有出現在機場，輝哥指太太在家中不小心撞傷隻腳，所以在車內等候，太太已給予子女擁抱，又笑言自己每次送機也會想起子女年幼時，但子女現已長大，分分鐘照顧番他。他說：「如果我去英國探他們，都是兒子安排，唔使我傷腦筋。而家我放心，女兒跟兒子一齊返去，始終女兒仲細，雖然生得高大，但都係小朋友，兒子同她一齊無咁擔心。」此外，陳敏之原本有份參與邵氏與內地合拍劇集《飛虎3之壯志英雄》，近日有指她因在社交網轉發一張圖片激嬲內地網民而被踢出劇組，改為陳煒頂替演出。身為拍檔的輝哥表示沒有影響，又讚首次合拍電視劇的陳煒好切合今次事業型的角色。對於敏之解釋為照顧小朋友而辭演，他說：「而家拍戲都係冒險去拍，但無辦法，無可能停下來直至零個案，大家有大家憂慮。始終她有小孩，唔通人哋開工，你唔開？其實有少少風險，但開工時全部人戴上口罩，長期有洗手液，加上每次場景開完幾日會做消毒，盡量做到最安全。」