許志安IG變戰場 復出舞台未復出社交平台

「安心事件」發生已經14個月，男主角「懷咗嘅」許志安終於復出，昨日(15日)到九龍灣為ViuTV節目《寶麗金50周年Chill Club》錄影，首次復工。雖然復出舞台，社交平台就未復出，但就算未有更新出post，都已經有網民留言，一派撐一派鬧，有網民更說：「我曾經係你歌迷會(會員)……而家連聽到你個名都作嘔。」至於許志安口中支持他復出的太太鄭秀文，其IG則依舊沒有提及老公，只出相出片說昨天拍完廣告：「工作完畢馬上回家，Lucky仔在等啊！」Lucky仔是他們養的15歲狗狗。

許志安的IG變成戰場，有人留言對他復出表示憤怒：「唔該唔好復工啦，見到你作嘔，有個咁好嘅老婆唔識珍惜。」「本身好鍾意你嘅歌，同老公睇你演唱會好開心，不過你唔好再復出，唔想再見到你，廿年感情你都唔珍惜，你真係好賤。」亦都有粉絲支持，說犯錯之後最重要改過：「今日終於有勇氣聽返你的歌。」「人哋老婆都原諒左佢，路人甲乙丙丁，還在好打什麼不平？想欺凌人？在口響的人本來就沒有支持過他的。所以更不應理會，就由欣賞你的人繼續支持就夠了。」目測正反雙方數量差不多，不如打和啦？