剛剛大學畢業的 BONNIE 同樣是個爬蟲動物愛好者，家裡養有7隻爬蟲，而關係與她最緊密的就是一隻叫「老三」的鬃獅蜥蜴。
由於蜥蜴有曬太陽的需要，BONNIE 經常會帶「老三」去公園散步放電，然而她發現香港鮮有適合牽帶蜥蜴的繩，於是就萌生 D.I.Y的想法，並在上年開始在網上參考台灣店製作，自己製作爬蟲牽繩，後來更嘗試在網上分享和出售。
「我有在淘寶淘過皮製爬蟲牽繩，但太硬同好粗糙，驚令老三唔舒服，於是後期參考台灣店賣嘅，試過做編織手繩咁嘅款式，」「後來醒起中學畢旅去日本買咗成喼布冇用過，就索性用布仿效台灣的皮革牽繩，出嚟個效果幾靚，甚至舒服過繩製款式，之後同老三出多次街覺得適用，香港又冇人做爬蟲牽繩，就膽粗粗開始賣嚕！」 BONNIE 不止有製作布牽繩，更有一些特別為爬蟲所勾織的小飾物和枕頭，造工精細，售價卻相宜，BONNIE 坦言其實都賺不了錢，只為興趣，而自己也是以「佛系」的速度推出新品，我問 BONNIE 在大學有否讀過相關學科，但原來她讀的是商科，我呆一呆，笑說她讀商科竟然做蝕本生意啊？
－現擁有什麼寵物，是時侯開始飼養？契機又是什麼？
總共有7隻，分別有兩隻豹紋守宮，叫「老大」、「小火龍」；一隻鬃獅蜥叫「老三」；一隻饅頭蛙叫「茶葉蛋」；一隻大守宮叫「卡茲」；一條球蟒叫「龍馬」，另外有一條豬鼻蛇，就是叫「豬」。 都來上大學前的暑假開始養，果陣有打工有自己錢，就丟錢落爬蟲度了 XD 鍾意爬蟲的主因係小學有次同屋企人去魚街，對變色龍一見鍾情，但媽媽唔比養，所以立志大咗要自己養爬蟲！
－在你心目中，牠最可愛的一個特質是什麼？
老大：炯炯有神嘅雙眼，好奇寶寶嚟，一放風就會去探險唔會停。
小火龍：嬌小玲瓏，細個拒食所以冇長成正常成體嘅體型，對白化眼令佢對焦咬食物嘅能力差啲，好似要特別照顧咁惹人憐愛，而家條尾仲肥過老大好叻女。
老三：傲嬌，平時係缸入面就唔點比我摸，一放出嚟一齊休息就會爬上我度，哄下就會瞓，媽寶一名^^
茶葉蛋：笨拙，比較大隻嘅蟀毛要咬幾次先咬到，係蠢萌！
卡茲：個外表夠晒型，但啲行徑又好奇怪，見到我會係咁係門口郁嚟郁去，但開咗門又會唔敢出嚟，一出就想爬上牆走，雖然個心好野，但係係最有反差萌嘅一隻><
龍馬：好型好靚，有次我隻手沾咗鼠味靠佢太近，搞到佢咬錯咗我隻手指，流咗好多血，鬆口之後佢因為尋血腥味而仲有啲亢奮嘅少許野性樣好可愛XD
豬：好蠢，明明想出嚟，隻手去打開佢個箱嘅蓋就會嘶嘶聲咁扮惡，捉咗出嚟就收晒聲想搵窿捐，真係得個樣。
－和牠們的相處多年，有過最深刻的記憶／經歷是什麼？
因為得老三需要出去曬太陽，所以同佢互動最多，咁就當然同佢最多經歷。最深刻嘅係有次帶佢出西貢，有啲路人好奇就圍咗埋嚟，太多人令到佢怕驚，原本坐係我隔籬，因為淆底所以就跑咗去我背後匿埋，爬蟲都會認人搵靠山 XDD
－暫時製作過些什麼產品？材料又有沒有需要注意的地方？
布繩：面布採用和風日系（因為私心鍾意XD）、底布選用薄棉布，軟身啲可以減低束縛感、繩揀咗傘繩，夠耐用又唔怕濕水。
飛龍翼：內部骨架用鋁線，夠輕身。
鉤織飾品：選用線，冇咁易鉤到鱗片，又唔會似毛冷咁易挑起晒啲毛毛。
枕頭：揀嘅係日本棉花，有標明可以洗嘅，實測過晾一日就乾，咁就唔怕枕頭沾到屎跡之後洗完要等好幾日先用得返。
－目前最滿意的作品是什麼？
雛菊頸環，因為個環用返橙色，只要係橙鬃戴嘅話，就會真係好似個頭係花芯咁，真正咁成為一朵花，有蠢萌嘅感覺！！！
－開店以來，最有滿足感的時刻是什麼？
客人回圖並讚賞嘅時候。因為係香港第一間做爬蟲牽繩嘅小店，所以好慶幸啲客選擇相信我、滿意我親手嘅 product，而且見到客人嘅鬃獅著得靚靚都好開心<3
－希望自己的創作可以達到什麼小目標嗎？
首先係希望感染到多啲爬奴帶需要日照嘅蜥蜴們去曬太陽，因為雖然揀養爬蟲多數都係因為唔太需要打理，但人工設備始終唔夠太陽好，太陽可以令佢哋健康啲、靚啲；其次就係想通過多咗奴才「曬爬」，令大眾認識到爬蟲其實係親切唔恐怖嘅，甚至可以少少改觀而覺得爬蟲可愛，雖然爬唔會似狗咁多互動，但其實會有啲似貓比人嘅傲嬌形象咁，你對爬蟲好，佢哋都會知道的。><
－有什麼建議或心得給新手飼養者？
一定要做好功課！例如係曬燈嘅setting就好重要啦，同唔到佢曬太陽就要係屋企整好個合適嘅環境！！另外就係希望大家都預留啲時間陪佢哋，就算爬蟲唔需要人類同佢哋互動，但都唔好成日困住佢哋，得閑就比佢哋係屋企散下步吧！