琴日嗰集《跳躍生命線》講到曾偉權飾演嘅何詠倫殺到麥在田屋企。當麥愛花同諾兒一番到屋企，就見到何詠倫坐咗喺度，仲向諾兒訛稱自己係麥在田嘅朋友。
開始時，佢心境平靜，對Diana好言相待，仲提議諾兒一齊整晚餐畀爸B食。
Diana想幫手一齊整Pizza，就畀何詠倫喝止，但之後秒變臉，解釋話佢著得咁靚，唔好整污糟佢。
鏡頭不斷影住何詠倫用刀，用剪刀，十足十變態殺手殺人前嘅狀態。
當諾兒整嘢食嘅時候，突然醒起冇同爸爸講游泳班改咗時間。本身何詠倫一臉慈父，聽到游水，佢又再變臉。因為佢個仔係游水浸死。但好快佢又變番慈父嘅樣，同諾兒傾計。當佢知道諾兒同佢個仔一樣游蛙式最叻嘅時候，佢將對仔仔嘅愛同痛惜都投放喺諾兒身上。
轉個頭，Diana諗住襯佢唔為意嘅時候報警，點知畀何詠倫發現，一手捉住Diana，另外一隻手就領住把剪刀，作狀想捅落佢度。佢真係嬲到震晒，個樣好似想殺死Diana咁！
麥在田番到屋企嘅時候搵唔到Diana同諾兒，就同何詠倫講數。開頭嘅時候，何詠倫充滿怨恨：「我個仔夠無辜囉，埋又係要死；我老婆呢？佢連螞蟻都唔會踩死一隻。」
麥在田問：「你都試過失去家庭嘅痛苦，點解你仲要傷害佢？」佢激動咁話：「係因為你錫佢哋，佢哋錫你！你有一個美滿嘅家庭！」當大家都以為佢妒忌麥在田嘅時候，佢突然轉換情緒，變得內疚，仲表示欣賞麥在田係個好爸爸、好細佬。
當佢道出仍然要對付麥在田一家嘅理由時，佢崩潰落淚、聲嘶力竭，又委屈又無奈咁話：「係因為…佢哋死晒啊！佢哋死晒啊！」
雖然佢嘅屋企人都死晒，但仍然有半點良知。「當我越查越深、越查越清楚嘅時候，你無可否認係一個好人。」佢仲話：「當份（死因）報告出咗之後，證實唔關你事，我冇得追究，更加冇辦法追究！」半年之後，佢老婆喺佢個仔出事嘅泳池外，撞車身亡，完全演繹到失去摯愛嘅嗰種委屈、椎心之痛。
佢唔單止冇再怨恨麥在田，更同佢講：「我以為搵個人畀我針對，我會好過啲。點知唔係，反而我個心更加唔舒服。係因為…我知你真係盡左力！」
面對間接／無意令到自己個仔死嘅人，佢竟然當面讚佢，體諒佢，曾偉權唔單止做到嗰種無力感，仲感染到觀眾！
最後，佢竟然自盡，話要落去一家團聚。麥在田深感同情，亦都話：「究竟邊個編劇，點解心地咁差！」
編劇嘅鬧自己心地唔好，呢個編劇真鬼馬！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）