廚師腸將停產？細數5款已成追憶的食品

曾幾何時，我以為全世界嘅雞肉腸都叫「廚師腸」。聽到廚師腸美國生產商Zacky Farms遞交破產申請保護令，令到呢款由細食到大嘅BBQ良伴有機會停產嘅消息，簡直有如晴天霹靂。雖然大昌行回應指「一直與不同生產商合作，會繼續在港分銷廚師腸」，不過味道究竟會否同以前一樣，都係未知之數。

回想返，原來有好多小時候覺得係人間美食嘅食品都已經離我哋而去。以下呢幾款已為追憶嘅食品，邊款最深得你心？

1. 四方果

第一款要提嘅當然係四方果啫喱，佢停產咗一年先被人發現，當時消息一出，不少網民都深感可惜。時至今日，眨下眼已停產四年，據說係因為瑞士總公司以健康產品為前題，淘汰含較多人造色素產品。

四方果或者未能符合現時嘅健康標準，不過就陪伴好多人成長，而最令人懷念嘅係可以用飲管啜嚟食，極之方便！

2. 奇趣杯

奇趣杯係唔少90後嘅童年回憶，同樣都係雀巢出品，雪糕杯分為兩層，上層係雪糕，下層則藏有玩具，仲會不時轉換卡通主題，有得食又有得玩，所以好受小朋友歡迎。不過唔知幾時開始停產，成為回憶。

經典廣告歌： 

3. 出奇蛋

小時候真心覺得Kinder出奇蛋可以滿足到三個願望！每次撕開錫紙，再剝開朱古力蛋殼都會感到莫名嘅興奮，因為唔知抽唔抽得中自己最想要嘅公仔。可惜因美國唔容許「甜食中完全包含毫無益處的東西」而禁售，於是生產商就研發出「奇趣蛋」取代「出奇蛋」。雖然某些地區仲有售出奇蛋，但喺香港就好難搵到啦。

呢個廣告應該睇過一億次：

4. 黃箭、白箭

箭牌係香口膠嘅老字號，以前最常食嘅就係薄荷味嘅「綠箭」和「白箭」，仲有水果味嘅「黃箭」，仲要係一片片嘅包裝，有同事就話細個去荔園掟香口膠階磚更加係集體回憶之王咁話。細個最鍾意食黃箭，因為冇薄荷辛辣嘅味道，而且係幾款中最甜，可惜而家喺香港已經搵唔到啦。

5. Mon Cheri朱古力

網上有唔少人話佢仲好食過金莎。其實兩款朱古力都幾似，同樣係朱古力包含一粒榛子，亦是送禮佳品，去拜年見到人哋屋企有Mon Cheri都會食幾粒先夠喉。可惜唔單止香港冇得賣，據聞連法國都已經停產。