好耐無行過太古城，最近一踏足，發現太古城中心地下，Adidas 隔離，開咗間 Asics 專門店。
見係新開張，入去行番轉。驟眼睇無乜特別，因為外觀、裝修，同其他 Asics 專門店完全無分別。
廣告（請繼續閱讀本文）
「咦，點解唔見我之前睇到嗰對跑山鞋? 」
同行朋友發現貨品嘅款式同銅鑼灣分店有異，搵唔到佢想買嗰對跑山鞋。莫非 Asics 啲越野鞋打贏所記、Hoka，賣到斷晒貨?
肥仔店員嘅答案，令到大家嚇一跳:「我哋呢間同銅鑼灣嗰啲舖唔同架! 佢哋嘅 Asic s專門店，由運X家管理，我哋太古城呢間係日本 Asics 自己做番!」
廣告（請繼續閱讀本文）
唔係啩，間舖個樣一樣喎!
「咁之前香港嗰啲專門店裝修同設計，都要跟足我哋日本總公司嘅要求吖嘛。」
店員話，太古城呢間舖，暫時係全香港唯一一間日本直營嘅專門店。同運X家管理嘅最大分別，係入嘅貨會好唔同。不過而因為佢哋啱啱喺11月尾開張，鞋款反而唔及有舊貨積存嘅運動家 Asics 店 (所以我朋友搵唔到對跑山鞋)。
廣告（請繼續閱讀本文）
如果細心睇，佢熱門款式 (如 Gel-Kayano) 嘅顏色又真係唔同出面見開嗰啲。而店員亦話，因為佢哋係日本直營，所以款式較新，亦會更為多元化，包括會引入唔同闊度嘅跑鞋。
喺度要強調，「全港唯一一間日本直營專門店」呢個講法，暫時只係呢位店員嘅片面之詞。我搵過官方網頁，分店資料仍然顯示共有8個分銷地點。至於係咪與別不同，唯有拭目以待啦。
Fitz連結: https://fitz.hk/?p=109139