【搵食CONY】「飲茶」開新店 獨家避風塘菜式辣得過癮

呢兩日凍到飛起，當然要食辣暖暖身。主打新派點心中菜的「飲茶YUM CHA」繼尖沙咀、中環同旺角開設多間分店，近日更進駐銅鑼灣，仲設計出只有此分店先有嘅獨家避風塘菜式，最適合天氣凍冰冰的時候食。

唔講唔知，原來香港第一個避風塘就係喺銅鑼灣，而喺60年代至90年代中有好多艇家做飲食生意，賣唔同嘅避風塘菜式，不過隨住漁業式微，呢種真正嘅避風塘風味已經漸漸消失，而今次「飲茶」開喺銅鑼灣，就想向避風塘美食致敬，推出銅鑼灣店限定的避風塘系列和艇家菜。

避風塘系列方面，主打當然係海鮮。首先要介紹超有氣勢嘅避風塘海鮮拼盤「唔止倒瀉籮蟹」，真係成籮海鮮拎出嚟個吓超級架勢，有齊蟹、鮑魚、蟶子、瀨尿蝦同扇貝，款款都新鮮厚肉，十分惹味。不過提提大家要有七、八個人先好嗌，唔係好易食唔晒。另外試咗「避風塘蜆塔蒸蛋」，蒸蛋除咗滑之外仲吸收咗蜆嘅鮮味，又淋上炸蒜香油，充滿避風塘風味。

其他艇家菜式就試咗「蜑家雞—魚湯浸雞」、「辣酒花螺」同「炸到見紅」，當中「炸到見紅」比較特別，將鴨血上粉炸，有兩重口感，帶點微辣，但略嫌有少少乾。最有驚喜嘅反而係看似平凡嘅蜑家雞，不但湯汁香濃，雞亦嫩滑，食完之後十分暖胃。

除咗以上菜式，新店又推出更多創新點心，例如「明太子腸粉」、「黑面墨餃」同「花生老豆」等。去開銅鑼灣又唔知食乜好，可以到「飲茶」新店一試。

「飲茶」– 銅鑼灣店

地址：銅鑼灣羅素街8號英皇鐘錶珠寶中心2樓

查詢： 2323 1288